Australia-a nu pakhat, kum 31 mi chu Cairns, Queensland-a Covid-19 quarantine hotel a hala puh a nih avangin man a ni.
He nu hian Pathianni tuk khan an inkhung hranna hotel pindanah hian, naupang pahnihte nena an inmut tawmna khum hnuaiah mei a tuah nia hriat a ni.
Chhawng 11-a sang Pacific Hotel-a inkhung hrang lai leh thleng mi 160 chuang chu lak chhuah vek an ni a, hliam tuar erawh an awm lo.
Australia-ah hian tun hnaia coronavirus variant hmuh thar, ram tam takin inkhuahkhirhna pawh an kalpui thar leh phahna, Omicron kai mi pahnih hmuh an ni tawh.
Omicron hi South Africa-ah hmuh hmasak ber niin World Health Organization (WHO) chuan ‘ngaihven ngai’ tia sawiin a lo kai tawhte tana kai nawn theihna a sang hle nia hriat a ni.
Canberra state chuan South Africa, Namibia, Zimbabwe, Botswana, Lesotho, Eswatini, Seychelles, Malawi leh Mozambique ram atanga an state luh an khap tawh a. Australian ni lo, heng rama chawlhkar hnih liam taa zinte chu Australia luh khap an ni bawk.
Australian hi thla 20 chhung ramri an khar a. Tun thla tir lama inkhuahkhirhna an thlahdul pawh he hri thar avang hian an kalpui leh mek ang em tih zawhna a awm mek.