Fingerstyle Guitar a thiam turu vanga social media lama hriatlar tak Lalrindika Zadeng chu Mizoram’s Got Talent (MGT) 2021 winner a ni ta.
Sports Minister Robert Romawia Royte chuan lawmpuina hlanin, “Mizoram’s Got Talent inelna pawimawh takah ka bial tlangval chhuanawm Rindika Zadeng, Chhinga Veng (kan veng tlangval ngat) Fingerstyle Guitarist chu pakhat a ni e. Ka lawmpuiin ka va chhuang em!
“Tv Rindika Zadeng, you are really ‘wonderful tonight’.” tiin facebook lamah lawmpuina leh duhsakna a hlan.
Rindika hian lawmman cheng nuai 3 bakah lawmpuina thil pek chi hrang hrang a dawng tel a. A pumpui angah mipui vote-ah pahnihna ni mah se, Judge te point pek belh nen a champion chiang hle.
First runner up-ah hian Magic show pui rem rem tak kalpui thin Ozaka Joute a lang a, vote ang zâwng chuan a hmu hnem ber nghe nghe a, Rs Nuaikhat leh singnga a dawng. Pathumna ah zaithiam duhawm leh thiam tak ni bawk Samuel Lalhriatpuia a lang a, Rs Singruk a dawng a ni.