Myanmar tual chhung buaina a ziaawm deuh nia a lan avangin tun hnaiah Mizoramah raltlan lut thar an tlem ta deuh a, buhseng tura Myanmar-a haw chho mi eng emaw zat an awm.
Raltlan tamna, Champhai district chhunga Tuipuiral huam chhungah nimin thleng khan raltlan mi 2,580 an awm mek a. Tuipuiral Group YMA hruaitute chuan an huam chhungah raltlan luh belh an awm mang tawh lo tih The Zozam Times an hrilh a, “Rawn lut an awm tawh lo erawh a la tih theih loha khaw thenkhat chuan mikhual pahnih bawr vel hi chu an la nei belh reng,” an ti.
Buh seng hun lai a ni a, Myanmar mi, Mizorama rawn tlan lut mi thenkhat chu an khuaah buh seng turin an haw tih Tuipuiral Group YMA hruaitute chuan an sawi a, heng mite hian buh an seng zawhah Mizoramah kir leh an tum niin an sawi.
Myanmar mi, an ram buaina tlansana Mizoram rawn lut tam zawk hi Chin state-a mite an ni a, Mizoram hnaih taka awm an ni a. Hetia boruak a ralmuan deuh takah chuan an ram lamah hian an haw chho leh thin a, Myanmar sipai an hran a, a ralmuan loh chuan Mizoram an rawn pan leh thin a ni.
Raltlan tamna, Tuipuiral huam chhung khaw hrang hrangah khawtlangin raltlan awmna tur relief camp an siam a, tun dinhmunah chuan relief camp-ah hian awm an awm mang tawh lo.
Tuipuiral Group YMA hruaitute chuan relief camp-a awm an mang tawh lo chhan sawiin, “Relief camp hi khaw pawn deuha siam a ni a, helai hmuna awmte hi khaw chhungah te an inhlawh duh a; chuvangin, khaw chhungah mi inte an luah a, an chhungte inahte an khawsa ta a ni,” an ti.
Myanmar atanga Mizorama rawn lut thar apiangte hi Covid-19 leng laka him nan relief camp-ah khung hran thin an ni a, tuna relief camp luahtute chu khung hran mekte an nih thu YMA hruaitute chuan an sawi.
Tuipuiral Group YMA hruaitute chuan October thla tir lam khan raltlante enkawl kawngah harsatna an tawh deuh thu an sawi a, mi an thahnem si a, Tuipuiral huam chhunga chengte thawhkhawmin an ei tur leh an intuam lumna tur thawmhnaw a daih seng lo tih an sawi a; mahse, tunah erawh chuan Mizoram chhung hmun hrang hranga pawl leh mi mal inphalte pek zarah raltlante tuam hlawmna tur mamawh khawp an nei rih tih an sawi.
Tun dinhmunah Farkawn khuain Myanmar mikhual an ngah ber a, mi 1,150 an awm mek a. Vaphai khuaah 410 an awm mek a, Thekte-ah 250, Khawbungah 239 leh Zawlsei khuaah 135 raltlan an awm mek a, a bak khaw dangah chuan raltlan mi 100 aia tam an awm lo.