Aizawl: Thu leh hla lama hriathlawh tak, Zofate inpumkhatna tur vei mi, L. Keivom, IFS (Rtd) chu nimin zing dar 5:46 khan cancer avangin a boral a, naktukah vui a ni ang.
July 15, 1939-a Pherzawl, Manipur-a a piang, Lalthlamuong Keivom hi nunau mipa pasarih leh hmeichhe paruk zinga a naupang ber niin, kum 1967-ah Indian Customs & Central Excise Service a zawm a, kum 1970-ah Indian Foreign Service(IFS)-ah inziak tlingin – Kenya, Saudi Arabia, New Zealand, Burma, Italy leh Maldives-ah te a awm tawh a, kum 2020 khan pension-in Delhi-ah a khawsa zui ta a ni.
A nupui, Dari (L) nen fa mipa pahnih leh hmeichhe pahnih an nei a, an fate hi mi puitling leh rintlak tak tak vek niin, UK, New Zealand, Indonesia leh USA-ah te an awm hlawm a. New Zealand-a awm an fanu phei chu Wwllington khawpuiah deputy mayor pawh a ni hial tawh a ni.
Lusei tawng lehkhabu – Zoram Khawvel 1 atanga 8, Bawktlang Thawnthu, Thuthlung Ram leh Pherzawl Titi te ziakin, Zoram Khawvel phei chu Mizo Acadamy of Letter-in Book of the Year-ah a thlang nghe nghe a. Hmar tawngin lehkhabu pasarih a ziah bakah article tam tak a ziak a, hla pawh eng emaw zat phuahin, Hmar hla eng emaw zat saptawngin a let tawh a. Bible bu pum pui Hmar tawnga letin type writer-in amah ngeiin a chhu chhuak bawk.
&&&&&