Rorel lai, BJP chuan Pathiannia vote tla chhiarah Tripura-a tual chhung rorel khawl inthlanah hnehna an chang chiang hle a. Agartala Municipal Corporation (AMC)-ah phei chuan member 51 awmnaah an chang vek a. Urban local body inthlan dangah pawh hnehna an chang.
Trinamool Congress leh Communist Party of India – Marxist (CPI-M) chuan AMC-ah hian seat khat mah chang lovin an awm leh a ni.
Khowai Municipal Council-a bial 15 awm pawh saffron party hian an la vek a. Bial 17 awmna, Belonia Municipal Council leh bial 15 awmna, Kumarghat Municipal Council bakah bial kua awmna, Sabroom Nagar Panchayat pawh an chang vek bawk tih Election Commission chuan a puang.
BJP hian ward 25 awmna, Dharmanagar Municipal Council, bial 15 awmna Teliamura Municipal Council leh member 13 awmna, Amarpur Nagar Panchayat pawh an la a. Sonamura Nagar Panchayat leh Melaghar Nagar Panchayat-ah pawh seat 13 ve ve awmin BJP hian an la vek bawk.
BJP hian member 11 awmna, Jirania Nagar Panchayat pawh an la a. Ambassa Municipal Council-ah seat 12 an la a, TMC leh CPI-M chuan seat khat ve ve changin independent candidate-in seat khat a la bawk.
Kailashahar Municipal Council-ah seat 16 lain CPI(M)-in pakhat an chang ve a. Panisagar Nagar Panchayat-ah seat 12 chu BJP bawkin changin CPI(M)-in pakhat an chang ve bawk.
BJP hian Agartala Municipal Corporation, municipal bod 13 leh Nagar Panchayat paruk inthlan turah hian candidate 334 an nei a. An candidate zinga 112 chu chuhtu awm lovin an tling hlawm.
Seat 222 la chuangah hian November 25 khan inthlangin mipuiin vote an thlak a. BJP hi inthlan campaign laiin Mamata Banerjee-i kaihhruai, Trinamool Congress nen nasa takin an inbei a, anni hi hmarchhak leh India ram hmun danga inzar pharh tuma bei mek an ni.
CPI(M) pawh an awm a, anni hi hun rei tak sorkar pawh lo siam tawh niin saffron party-in an paih thlak tak an ni nghe nghe.