Lal Thanhawla thlaka Congress president thar tur Lalsawta


Mizoram Pradesh Congress Committee (MPCC) chuan hruaitu insiam remin, president thar atan Lalsawta an pawm nawn.
Congress party hruaitu thar turte hi President Lalsawta bakah hian Vice President-ah Lal Thanzara leh Treasurer-ah Zodintluanga Ralte te an ni.
President atana pawm thar, Lalsawta hi tunah hian vice president nihna chelh lai a ni a, Lal Thanzara hi general secretary ni lai niin, Zodintluanga Ralte hian treasurer nihna a chelh nawn leh dawn bawk.
October 10, 2021 khan Congress party elected office bearers (OB) meeting-ah tuna hruaitu tharte hi pawm niin thutlukna siam a ni tawh a. Mahse, Tuirial bial bye-election boruak laite a nih avangin puan zar lawk a nih loh hnuah, nimin khan MPCC President Lal Thanhawla chenna inah thutlukna an lo siam tawh chu MPCC elected OB thukhawmin an ennawn leh a. He thutkhawmah hian thutlukna an lo siam tawh chu pawm nawn lehin, hruaitu thar turte hi an tifel ta a ni.
December 17, 2021 khian kum 2021 chhunga Congress Bhawan kharna hun hman a ni dawn a. He hunah hian MPCC elected OB tharte hi official takin Lal Thanhawla hian a puang dawn a ni.
Kum 1973 atang khan Lal Thanhawla hian Congress party president nihna a lo chelh tan tawh a. Hrangaia (1976-1977), Lalduhoma (1984-1985) leh Sainghaka (1991-1994) ten president nihna an chelh chhawk tih loh chu president nihna a chelh a ni.
Congress party president atana pawm thar chungchangah Lalsawta chuan, “Kei aia tawnhriat nei tha zawk Pu Zoramthanga leh a thuihhruai minister senior, thil ngaihtuah kum tak tak te; kan ngaihtuahna min rawn luhkhung ta emaw tih tur khawpa thusawi thiamte hi kan el turte an ni dawn a. Mahni insit chu a awl khawp mai,” tiin The Zozam Times zawhna a chhang.
President Lal Thanhawla a thlak tur chungchangah Lalsawta hian, “Miin Congress an tih pawha mitthlaa lo lang nghal a nih bakah hruaitu ropui, vawi nga chief minister ni thei, inthlanpuiah term kua MLA anga thawk a, inthlanpuiah vawi 12 thlan tlin a nih avanga certificate of election an tih pawh vawi 12 dawng tawh a ni a, a ropui a ni. Chuvangin, Pu Hawla nena khaikhin tur zawng hi chuan ka la inngaihtuah ngai lo a ni,” a ti.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427