Union Health Secretary Rajesh Bhushan chuan tun hnaia SARS-CoV-2 hrik inthlak danglam thar, Omicron tia a hming vuah chungchanga lo inralring turin state leh UT zawng zawngte a hriattir.
Health secretary-in state/UT chief secretary te DO letter a thawnah chuan November 24, 2021-a Sotuh Africa-a hmuhchhuah thar Omicron hi World Health Organisation (WHO) chuan Variant of Concern (VoC)-ah a puang a. Inven nan state leh UT zawng zawngte chu Covid-19 hri kai dap chhuah hna chu inthlahdah loa chak zawka hma la tur te, hri kai leh kai loh endikna hmanrua tichangtlung tur te, Covid-19 hri danna pek chhuah kawngah zau zawka hmalak kalpui tur leh Omicron hri kai thar an awm pawha khung hran dan tur leh ruahmanna lo nei lawk vek turin a hriattir a ni.
Sorkar laipuiin he hri inthlak danglam thar hmuhchhuahna ramte chu ‘At-Risk’ huangah dahin ram pawn atanga zin veivakmi India lo lutte tan inkaihhruaina thar khauh taka siam a nih thu te, a bik takin ‘At Risk’ ram atanga India zinte chu an zin kual tawhnate tha taka chhinchhiah turin leh an test sample-te chu genome sequencing turin INSACOG Lab-a thawn zung zung turin state leh UT zawng zawngte a hrilh.
State thenkhatin RT-PCR test an hnawl tawh chu tha lo tiin, heng test-na hmanrua changtlung zawk a awm loh chuan ram chhunga hri darh dan hi chiang taka hriat theih a nih loh avangin state tinte hian sample test-na hmanruate tihchangtlung kawngah hma chak taka la tur leh sample test dan inkaihhruaina khauh taka kengkawh zel turin a ti.
Hri kai tamna hmunte chu thlithlai reng tur leh positive sample-te chu rang taka genome sequencing ti turin INSACOG Labs-ah thawn zung zung tura a hriattir bakah, state tinte chu a tam thei ang ber hri kai leh kai loh endik hna thawk turin leh positive rate 5% hnuai lama awm thei tura tan la turin a hrilh a ni.
Hun kal tawhah Covid-19 chungchangah hian thu dik tawk lo thehdarh avangin mipuiah nasa takin nghawng tha lo a neih phah a. Heng buaia leh harsatna te sukiang turin state tinte hian ngun zawkin press briefing te nei a, finfiahna nena information pe chhuaka mipuite hnena thudik puang chhuak thin turin a ti bawk.
Ram pawn atanga India rama zin te tan sorkar laipuiin inkaihhruaina thar
- India ram rawn zin international passenger zawng zawngte chuan mahni chanchin chiang taka ziakin form an dah khat tur a ni a. RT-PCR test negative result chuanna report an nei ngei tur a ni a. He’ng inkaihhruaina thar duan te an tihlawhtling lo a nih chuan India ram an lut thei lo ang.
- ‘At Risk’ ram tia puan, he’ng South Africa atanga India ram zin te chu, India ram an thlen rualin RT-PCR test neih tur a ni a, an positive a nih chuan inkhung hran nghal an ni dawn a. Sample an lak pawh genome sequencing tia endik tur a ni a. Omicron strain an kai tih hmuhchhuah an nih chuan inkaihhruaina khauh zual zawk hnuaiah khung hranna kalpui an ni ang.
- ‘At Risk’ ram atanga India ram rawn zin te chu an sample endik an nih hnuah negative result an nei a nih pawhin, ni sarih chhung home quarantine tura tih a ni a. Ni riat-naah sample endik leh an ni ang.
- ‘At-Risk’ ram atang ni lo, ram pawn lam atanga India ram rawn zin hrim hrim te pawh RT-PCR test nei tura tih an ni. He’ng sample endik atanga hri kai hmuh chhuah te chu genome sequencing tura thawn nghal tur a nih bakah, hri kai te chu quarantine tura tih an ni.
- Omicron la hmuh chhuah lohna ram atanga India rawn zin te zingah negative test result an nei a nih pawhin, chawlhkar hnih tal mahni inchikin uluk taka inenkawl tura rawn an ni.