Union Health Minister Mansukh Mandaviya chuan COVID-19 variant thar kai chu India ram chhungah hmuh a la nih loh thu a sawi a, “Eng dinhmun pawh tawng ila, lo hmachhawn turin kan inpeih,” a ti bawk.
Parliament thlasik thutkhawm neih mekah Thawhlehnia Rajya Sabha-a zawhna leh chhanna hunah Mandaviya chuan he hri leng chungchang an hriat angin himna tura inkaihhruaina siamin hma pawh lak nghal a nih thu a sawi.
“Rinhlelhawm deuhte chu rang takin kan endik a, genome sequencing pawh tih zel a ni a. COVID avanga kan buaina atangin thil tam tak kan zir chhuak a, tunah chuan thil kan nei thain laboratory pawh kan nei changtlung tawh a, eng pawh lo tawng ila kan lo sual let thei ang,” a ti.
India ramah he hri a lo luh loh nana tihtheih ang zawng zawng chu an ti tih minister chuan a sawi bawk.
WHO chuan COVID-19 variant thar, B.1.1.529 tia an sawi bawk hi a ngaihvenin ram tinte chu inbuatsaih turin a chah.
Prime Minister Narendra Modi pawhin vantlang hriselna lama inbuatsaihna leh vaccine pek tawh dan thlirin hotu liante a kawm.
Prime Minister Office-in thuchhuah a siamah Omicron hi India-ah pawh ngaihven niin ram dang atanga lutte chu endik uluk tur te, ram hlauhthawnawm atanga lut phei chu chik lehzuala en te, ram dang nena intlawhpawhna pawh a tul anga ennawn tura a tih thu te tar lan a ni.
India ramah hian darkar 24 liam ta chhung khan Covid-19 kai mi 6,990 hmuh chhuah leh hman niin hei hi ni 551 zet hnua ni khata hmuh chhuah an tlem ber tum a nih thu union health ministry chuan a sawi.
Darkar 24 liam ta chhung hian mi 190-in hripui hi an thihpui leh hman a. Hri kai hi mi 3,45,87,822 hmuh chhuah tawh niin mi 4,68,980-in an thihpui tawh bawk.
Darkar 24 liam ta chhung hian a kai hmuh chhuah aia enkawl dam an tam zawk avangin enkawl mek hi mi 3,316-in an tlahniam leh a, mi 1,00,543 enkawl mek an la ni a, hei pawh hi ni 546 hnua a hniam lai ber a ni.
Ministry-in thuchhuah a siamah, “Damlo enkawl lai hi hri kai hmuh tawh atanga chhuta 0.29% chauh ni tawhin March, 2020 hnua a hniam lai ber a ni,” a ti.
Sample endik pawh a hma nia 7,62,268 chauh ni chu 10,12,523 a ni leh tawh a. Indian Council of Medical Research (ICMR) chuan sample 64,13,03,848 endik tawh a nih thu thuchhuah an siamah an tar lang.