Raltlan karah ruihhlo leh sualna dang awm thei vil uluk ngai ti


Myanmar raltlan te chungchangah nimin khan Addl. Chief secretary JC Ramthanga hovin sorkar official te, Task group on Myanmar refugees, CYMA hruaitute leh Human rights & law network (HR&LN) aiawhte an inrawnkhawm a. Dan leh thupek kenkawh chungchangah leh ruihhlo leh sualna dang awm palh thei te uluk zawka vil tul an tih thu an sawi.
He inrawnkhawmnaah hian Myanmar raltlan chungchanga harsatna awmte leh hmalakna hrang hrang te leh a kaihhnawih thu pawimawh dang te an sawiho tih sorkar thuchhuahin a tarlang a, eng thutlukna nge an siam tih erawh tarlan a ni lo thung.
Myanmar raltlan chungchanga inrawnkhawmnaa HR&LN aiawha tel Vanramchhuangi chuan sorlar laipuiin Myanmar raltlante chu a pawm loh thu leh thawnkir leh turin hmarchhak state thenkhat chief secretary te lehkhain a hriattir tih a sawi a. Hei vang hian Mizoram sorkar pawhin alang a pauva a dawnsawn theih loh thu leh raltlan te chu mipuiin a theih ang anga an lo tuamhlawm thu a sawi.
“Burma ram Chin hills a chengte leh Mizoram mite hi unau chhulkhatkual kan ni” Vanramchhungi chuan tiin, “State sorkarin dawngsawngin lo tuamhlawm thei lo mahse, raltlan te chu Mizoram mipui hian engti zawngmaha thawnlet kan tum lo” a ti a. “Unau chhulkhatkual kan nih vang chauh ni lovin, mahni mihringpui, an damkhawchhuah beiseia min rawn pantute lo tuamhlawm hi mihring nihna leh Kristian kan nihna anga kan tihmakmawhah kan ngai” a ti.
Myanmar raltlan lo dawngsawnga lo buaipuitu ramri hrula awm khawtlang, tlawmngai pawl leh kohhrante fakin “Khawchhung in tina ramtlan te mamawh vawi thum khawn tawh khuate pawh an awm a, Burma refugee tan an insawrfu tak meuh meuh a ni” Vanramchhuangi chuan a ti bawk.

Leave a Reply

Your email address will not be published. Required fields are marked *

error: Content is protected !!