Suu Kyi-i thubuai thu-tlukna puan hun sawn


Myanmar-a court chuan sipaiten an ram hruaitu an paih thlak tak, Aung San Suu Kyi-i’n dan bawhchhiaa an puhnaa thutlukna puan hun chu December thla tir thleng an sawn hla.
Nobel Peace Prize pawh lo dawng tawh, Suu Kyi-i hi November, 2020-a a kaihhruai, National League for Democracy (NLD) party-in an ram inthlana hnehna changa thlan tlin a nih leh hnu, February 1-a sipaiten thuneihna an chhuhsak atang khan hren a la ni zel.
An khawpui, Naypyidaw-a court chuan Thawhlehnia an puhna dang bakah COVID-19 inkaihhruaina bawhchhiaa an puhna thuremna puan tura tih a ni a. Thiam loh a chang a nih chuan Suu Kyi-i hi kum hnih lung in tang thei tur a ni.
Natural Disaster Management Law pawh bawhchhiain nikum inthlanah khan pun khawm khap phal loh laiin mi hui khawmin a campaign niin an puh bawk.
Kum 76 mi, Suu Kyi-i hi ei rua puh a ni bawk a, inthlanna tichingpena puh ni bawkin hengte phei chu dam chhung tan theihna a ni.
President paih thlak ve tho, Win Myint leh Naypyidaw Mayor Myo Aung te chu a lama tanga thuhretu zingah an tang a. President hlui pawh hi COVID-19 inkaihhruaina bawhchhiaa puh ve tho a ni.
December 6-ah Suu Kyi-i thubuai thutlukna hi puan a nih rin a ni a. Hetah hian dan lova walkie-talkie a kawl chungchang pawh ngaihtuah a nih rin a ni.
Sipai sorkar hnuaia awm court-in an hruaitu hlui laka thubuai remna a tihkhawtlai chhan hi hriat mai a ni lo va. Walkie-talkie kawl chungchanga thutlukna pawh a hunah puan a ni dawn em hriat a la ni lo va; mahse, mi tam tak chuan heng puhnaah hian thiam loh a chan vek an ring.
“Myanmar-a court-te hi sipai thuhnuaiah an awm nasa hle a, hei hi thuremna puan chhan pawh a ni ang, thiam loh an chantir hi mi tam ber rin dan a ni,” tiin Human Rights Watch hnuaia Asia division deputy director Phil Robertson chuan a sawi.
Myanmar-a mihring dikna chanho humhalhtu langsar tak leh sipai sorkarna duh lohna lantir huaihawttu, Thinzar Shunlei Yi pawhin thuremna puan hun tihkhawtlai hi sipai thuneituten boruak lian lutuk tur an tihdaihna hmanrua mai niin Al Jazeera hnenah a sawi.
Myanmar-a mipui rorelna a din theih nana nasa taka beitu leh mihring dikna chanvo humhalhtu hruat hlawh, Suu Kyi-i hi a dam chhung hun tam tak hi pawn chhuak thei lova hun hmangin sipai sorkar hun hmasa khan kum 1988 atanga 2010 thleng khung a ni.
Kum 2016 khan an ram roreltu a ni tan a; mahse, khawvel hriatah mualphona nasa tak a nei a, an ram chhungah erawh a lar deuh deuh zel thung.
Khawvelin an demna chu an rama hnam pakhat, hnam tlem zawk leh Muslim sakhaw zuitu, Rohingya laka an ram sipaite chet dan vang a ni a. An chet hun lai hi an rama thuneihna a chan lai a ni a, amah chuan heng hnam suat tumna engmah a awm lo tiin kum 2019 khan International Court of Justice-ah a sawi nghe nghe.

Leave a Reply

Your email address will not be published. Required fields are marked *

error: Content is protected !!