Zai leh ruai theh phal leh phal loh chiang lo!


Hri leng avanga inkaihhruaina thar, nimina Mizoram sorkarin a tihchhuahah sakhaw biakna hmuna zai phal a nih leh nih loh tar lan a ni lo va, Krismas leh kumthar ruai theh phal a nih leh nih loh tar lan chian a ni lo bawk.
Inkaihhruaina thar, zanin zanlai atanga January 15, 2022 zanlai thlenga hman turah hian biak ina inkhawma zai phal a nih leh nih loh tar lan a awm loh laiin, AMC huam chhung atana State Level Expert Team on COVID19 Management (SLETOCOM) duh dan tar lanah erawh mask vuah lova thusawi leh zai a him loh avanga mi dang hnaiha thusawi lai leh zâi laia uluk taka surgical mask tal vuah thin tur a nih thu erawh tar lan a ni.
Krismas leh kumthar lawmna ruai theh phal a nih leh nih loh pawh sorkar inkaihhruaina tharah hian tar lan a ni lo va. SLETOCOM duh dan tar lanah erawh ‘ei leh in sem leh ruai theh mup mup a la him rih lo va, buatsaih loh ni thei se’ tia tar lan a ni thung.
Hri leng vanga inkaihhruaina tharah hian district magistrate-ten zan (dar 9 atanga a tuk zing dar 4 thleng curfew an puanna thupek an chhuah tur thu tar lan a ni a. AMC pawn lamah chuan district bawrhsapte an district-a hri leng dinhmun azira inkaihhruaina siam tura tih an ni bawk.

Leave a Reply

Your email address will not be published. Required fields are marked *

error: Content is protected !!