National pollution control day 2021 pualin nimin khan Mizoram pollution control board (MPCB), Mizoram Envis Hub leh Champhai district cycling association te tanghovin Champhai-ah Cycle Rally an buatsaih.
Cycle rally-ah hian Champhai district cycling assn. member 30 vel an tel a. Champhai Vengsang Biak in kawn atanga Km 7-a thui Champhai Zotlang thleng tlanin, Khankawnah kualin Kanan Veng an lut leh a. Boruak thianghlim leh hrisel, bawlhhlawh leh boruak tichhe thei dangte venga fihlim tura inzirtirna T-shirt leh thuziak te an sem nghal a ni.
Champhai dist. Addl. DC Henry C Lalrawnkima’n December ni 2 leh ni 3, 1984-a Bhopal union carbide plant atanga gas hlauhawm tak (Methyl Isocyanate) putin mi 20000 vel nunna a lak bakah mi tam tak hriselna a tihchhiat hriatrengna atan kumtin December ni 2-ah national pollution control day chu hman thin a nih thu a sawi a. He chhiatna thleng hi kum 37 hnuah pawh a bul hnaia chengte chuan an la tuar zel a, Bhopal leh a chhehvelah nau pian fello an tam a, boruak leh tui thianghlim dàn pawhin ngai a la awh hleitheilo nia sawiin, leilungin a tawrh thu leh an thlai tharah pawh gas zungzam a la awm zela hriat a nih thu a sawi.
Henry C Lalrawnkima chuan “Kan chenna leh chhehvel kan suasama kan tihbawlhhlawh thin avangin chenna tur hmun kan neih chhun hi chenna tlak lovah kan siam lui mek” a ti a. Khawvel pumah kumtin Mizoram mipui let 6 aia tam mah boruak bal/tha lo hip avanga an thih thu leh mi 10 zela mi 9-in boruak leh tui thianghlim duhkhawp an hmu thei tawh lo nia mithiam ten an chhut thu sawiin, “Kan khawsak phung pawlawh lutuk avanga boruak leh tui kan tihbawlhhlawh chak ziate, thing leh mau leh leilunga malsawmna awm ten an tawrh phahziate, a chhunga cheng mihringte leh nungcha ten a nghawng kan tawrh let mekzia te hi ngaihtuah chianga kan harh chhuah a hun takzet tawh a ni”, a ti bawk.