Mizoram Larsap Dr Hari Babu Kambhampati-a’n nimin khan zan khat riak turin Siaha-ah a tlawh a. Niminah vek MADC leh Mizoram sorkar official te kawm nghalin, Siaha district dinhmun leh Siaha police te dinhmun te an sawiho.
Larsap chuan sorkar laipuiin scheme tam tak – PMJDY, PMJJBY, PMSBY, APY, PMUY leh a dang ten mipui hnen a thlena, mipuiin an chhawr tangkai theihna tura mipuite hnena awareness pea, chak taka scheme kalpui theuh turin officer kalkhawm te chu a ngen a. Mizoram sorkar leh MADC hnuaia official te pawh inlungrual taka Siaha district hmasawnna tura thawkho zel turin a chah.
Dr Hari Babu Kambhampati chuan “Kan Prime Minister Narendra Modi-a’n COVID19 hrileng avanga kan harsatnate hi mahni kutkea dinga, intodelhna kawng min zawhtir tura remchangah i hmang ang u, tiin min sawm mek” tiin, he sawmna tihhlawhtlin tum theuh turin mitin te a sawm a. “Autonomous council chungchanga India danpuiin ka chunga mawhphurhna a dah te tha taka hlenchhuah ka tum a ni”, a ti bawk.
Larsap chuan kohhran hrang hrang hruaitute, political party hrang hrang hruaitute, tlawmngai pawl hrang hrang hruaitute leh MADC hruaitute pawh a kawm a. Amôbyu Vaithie-a Middle school tlawh bawk. Vawiinah Siaha chhuahsanin Chawngte a pan leh dawn a ni.