Rural development minister Lalruatkima’n nimin khan ministry of rural development secretary Nagendra Nath Sinha hmuin, sorkar laipuiin MGNREGS hnuaia ni za inhlawhna sum a la release loh awmte chu Kristian te hunpui Krismas hmaa mipui an dawn theihna tura theihtawp chhuahsak turin a ngen.
Ministry of rural development secretary chuan Mizoram RD minister-in a hnena a thu thlen te chu lo bawhzui sak a tiam niin sorkar thuchhuahin a tarlang a. Nimin vek khan Lalruatkima chuan ministry of home affairs-a border management division secretary Dr Vivek Joshi pawh hmuin, Border area development programme (BADP) kum 2021-2022 kalpuina tur sum a rang lama release sak turin a ngen a, kum 2020-2021 chhunga BADP sum la release loh 2nd tranche Rs. nuai 1228.95 pawh a rang lama release sak turin a ngen.
RD minister thu thlen chu a tul anga a lo bawhzui tur thu leh a rang thei ang bera 2nd tranche chu release an tum tur thu ministry of home affairs-a border management division secretary chuan a sawi niin sorkar thuchhuah chuan a tarlang a. Ministry of rural development secretary chuan RD minister hnenah hian Mizoram sorkar, a bikin RD deptt. chu scheme hrang hrang an kalpui danah titha a tih thu leh hmalakpui pawh phurawm a tih thu a lo hrilh niin a tarlang bawk.