- Lallunghnema, Charity Lodge
Chhiartute chibai u le,
Tuna ka article hi kumin atan chuan a hnuhnung lam a ni tawh dawn a. Hun kan la nei a nih chuan vawi khat dang chu ka lo lang leh mai thei e.
Kumin 2021 hian he huangah hian Consumer Right Awareness article vawi 50 ka ziahna a lo ni ta a. Heng article-te hi a buin ka siam leh ang, ka ti a. Kum 2020 a ka article-te pawh kha hei,a bua khawr pumin ka ti chhuak leh tep tawh a nih hi! In lo chhiar leh sup sup dawn nia! Bahlah lovin ka hun ka la luah thei zel hi min hriatpuitu leh min awmpuitu a awm a, chu chu Pathian engkim ti thei a ni. Ka lawm hle mai. Chung ka thu ziak lo chhiartu engemaw zatin in lo hlawkpui thin tih ka hriatin ka lawm leh zual a.Thil tha lo titute hi kan beihte an ni a.An nei nungin an hausa si a. Chuvangin kan huaisen hle a ngai a, tanrual pawh a tul hle a ni. A khat mawi tawkin Consumer-te harsatna kan buaipui reng a tul bawk a. Tangka beisei lova intanpui hi a hlu a, a tha a, mahse tlin a har em em a ni. Sap hovin ‘Blessing in disguise’ a tih angin harsatna tawk consumer te an lawm rual hian anmahni puitu Activist te chu an lawm veng veng bawk thin a ni. Consumer Activist te hian lawmman beiseiin an nei ngai lova. Harsatna tawk consumerte tanpui thei a, an awm chu an lawmna ber a ni thin. Heng Consumer Activist te leh Consumer Pawl hian mite lawm an hlawh ngai lova, sumdawng leh dawrkaite huat an hlawh nasa thin hle. Hamthatna a awm loh avangin inpekna tak tak leh engkim chan huama beih ngam lo tan chuan an zinga tel ve ngawt chi a ni lo. Chuvangin Activist huaisen nih a ngai a, retheih huam nih a tul bawk thin a ni. Chutiang a nih avang chuan mi tam tak chuan heng consumernissue-a inhmangte hi an en liam mai mai thin a. Mahse an thil lei chungchanga, harsatna an tawh chuan Inthlahrung lo takin an pan leh mai thin. Hengho hi ‘mi a’ tih dawnin a ni chiah si lo,’a, fing,depde,’ an ni ber e. Consumer an ni tih pawh hre lo, thil leinaa harsatna tawk tam zawk chuan thil hriat an tum lova, hriat belh an chak ngai hek lo. Mahse an nitin nun hruaitu chu Consumer Protection ze ril hi a ni tlat.
Consumer huaisen chuan thil man sang a duh lo mai ni lovin a do thin a. A tul dan a zirin a pen chhuak thin. Consumer huaisen chuan a thil lei leh hman tur chu a bel chiang hmasa thin a. Thil siamte chu a siam Ni, Kum leh Thlate a en phawt a. Khawi atanga siam nge, tihte a zir hmasa te te thin a ni. Consumer huaisen leh rinawm chuan bungraw hman tlak lo leh chhia a lei duh ngai lova, a lei hmain ei tur chi a nih chuan chu ei turah chuan eng engte nge tel tih a hre hmasa thin a ni. Thil fun packed a ni emaw a finna a thil inziaktr chu a en ngun hle thin. Consumer huaisen leh rinawm chuan expiry date te a bih chiang hmasa thin. Expiry date emaw best before tih inziakte chu a en hmasa thin bawk. Expiry date pel chin bungrua reng reng Consumer huaisen chuan a lei ngai lo a ni. Chutiang ti mi a nih avang chuan bungraw hlauhawm a lei ngai lo. Consumer huaisen chuan thil a lei apiangin cash memo emaw reciept emaw a la ziah thin. A thil leia a lungawi loh chuan a ngawi mai mai ngai lova, dawrkaite hnenah a sawiin a thlen thin. Cash memo la lo chuan tute dawr mah a chhuahsan ngai lo. A tan chuan he Saptawng thu lar tak, ‘Goods one sold cannot be returned,’ tih hian awmzia a nei ngai lo. “Bungraw chhia ka lei chuan ka thleng leh ngei tur a ni,” a ti thin. A ropui hle mai!
Consumer rinawm leh huaisen chuan warranty period hi a hmang tangkai thin hle. Bungrua (khawl thil) a lei apiangin warranty period a en hmasa ziah thin. Chutianga warranty a ngaih pawimawh thin avang chuan harsatna a tawk ngai lo. A bungraw lei chu lo chhe mahse warranty nei a nih chuan harsa em em awm lovin a thil lei zuartute nen an in rem thlap thei thin a ni. Consumer rinawm leh huaisen chuan MRP hi a en uluk thin hle bawk. A thil lei reng reng Maximum Retailed Price aia sangin a lei ngai lo. Seller – in MRP aia sang a bungrua lei tir a tum pawhin a vau khan let zawk fo thin. A tul chuan dawrkaite hriat tur thil tha tam tak a hrilh hre zawk fo thin. Consumer Right te pawh a zirtir bawk thin a ni. Consumer huaisen chuan dawrkai leh sumdawngte chu a thil lei a harsatna a tawh dan a zirin a tul chuan Consumer Court-ah a khing thin. Consumer-te zinga harsatna neite a tanpui thin bawk.
Consumer huaisen ni tur chuan zir tam a ngai a, chhiar tam a, inchhiar zau a tul hle. Consumer Protection Act leh Rules te hriat ve a ngai a. Consumerte dikna leh chanvo humhalhna Dan chi hrang hrangte chu a hriat bel a tul thin a ni. Hriat lohna hi Danin a ngaidam lo angin Consumer right hre lo chu a huaisen ngai lo a ni.
Mizoramah hian Dawrkai leh Service providerte hi an vawk lal len rei hle mai a. Consumer-te harh chhuah an hlau va, consumer fing tak tak leh huaisen tak tak, hrat khawkheng te an lo chhuak ang tih chu an hlauh ber a ni. Hlep tam tuma khawsa a che thin an nih avangin an hekna tur ang chi hi chu an ngaihsak duh ngai lova. Buk tling lova thil hralhtu nih pawh chu man inthlahrung ngai lova, zahna Chang an hre ngai hek lo. He thil fair lo tak hi consumer huaisen chuan a do ngam thin a ni.
He Zoram intodelh lova hmingthang hi consumer te lalna rama siam anih theih nan kan bei zel dawn a. Zoram mipuite changkanna dika an changkan theih nan huaisen takin thil dik lo, consumerte tana phurrit chu phum bo kan tum a ni. Consumer Right kan neih theih nan consumer Huaisen tak tak hmuh tur an awm a. Chung mite chuan Consumer Movement mei chu an chhem alh thin a ni. Rev.LN Ralte ka hre reng thin a, Pu Lalupa te, Pu Buala te, Pu Sawta te, Pu Lura te, Dr. Thangchungnunga te ka theih nghilh thei hek lo. Hengho hi consumer huaisen zinga tlar hmasaa thu turte an ni.
Consumer huaisen-ten hma han hruai zel se, tih tak zet a kan beih a ngai a ni. He Zoram hian Kristian consumer, Kristian Dawrkai, Kristian sumdawng, Kristian Service provider te hmel hmuh tawh a beisei mek a ni. Consumer huaisen chu a ding chhuak a, mipui nun a ti hlim thin. Consumer dawihzep erawh chu an tlo ngai lova. An ding Chang ngai hek lo.
He consumer huaisen thu thawn hi kan thu leh hla tihtawp nan kan hmang ang. Emmanuel MS Tluanga chuan heti hian a sawi a. “Lenovo Online Store atangin Lenovo G 27-20 68.5 cm (27) FHD Gaming Monitor Rs.15,999/- man ka chah a. Pawisa pawh ka pe a.Order ni (a lei ni) atangin kar 2 a ni tawh dawn a, engmah chungchang min lo hrilh hre lo hrim hrim a.
Tunkar Thawhtanni khan Bluedart ngaihvenin ka zuk zawt a, kan kutah an la hlan lo tiin min lo chhang a.
Thawhtanni atang khan tlai tin Lenovo customer service ka zuk zawt thin a, tun atanga 24hrs chhungin kan rawn dispatch ang tiin min lo chhang ziah a, thawhlehni phei kha chuan naktukah kan rawn dispatch ang, dispatch hunah kan rawn call ang che tiin min lo chhang a. Nimin tlai thleng khan chhanna ngai hlir min lo pe a. Tukin khan Bluedart lamah ka zu zawt fiah leh a, an hnenah hlan a la nih loh thu bawkin min lo chhang ta fan a.”
Sawma of Sihphir hian kei teh chai hi ka puihna beiseiin min rawn bia a. Kei pawhin Lenovo hi biak ka tum thin a. Ka be tlang thei lova. Han ‘trim’ ka chak teh reng nen. Mahse, he thu ka buatsaih lai hian he sumdawng phone call la tha duh lo hian Sawma hnenah hian a thil lei chu an ‘delivered’ sak tak thu amah,Sawma ngei hian min hrilh a. Thil lawmawm tak a ni. Sumdawngte hian sual an chhuah in phone call an la tha duh lo fo thin. Hetiang sumdawngho hi consumer huaisen te chuan an hmachhawn mek a, an hneh zel bawk ang. Consumer chu a huaisen tur a ni. A rinawm tur a ni. Ram sumpai chawklettu berte chu Consunerte hi an ni.
Nang mi thiam, Pawl hruaitu,
Nang mi thiam, Ram hruaitu,
Nang mi thiam, Politician dik inti,
Nang mi thiam, Babu Lian,
Consumer i ni tih hi inpawmin
I kein ding la, lo pen chhuak rawh le!