Govt. GM Higher secondary school, Champhaiin an kum 25 (Silver Jubilee) tlin lawmna kalzelah zirtirtu leh zirlai ten faina beihpui thlakin, nimin khan Champhai khawpui chhung hmun hrang hrang tifaiin an hnatlang.
Faina beihpui hawnna sikul tualzawla neihah Champhai DIPRO Dr. Lallawmkima’n Govt. GM HSS-in kum 25 a tling ta chu a lawmpui thu leh jubilee puala an hmalak tawhnate tha a tih thu a sawi a. Faina beihpui an kalpui chu tha a tih thu leh lawmawm a tih thu a sawi.
Champhai DIPRO chuan faina tluantling nei tur chuan naupang atanga tana inzirtir a tul thu sawiin, Faina chu nunpui tlat a tul tih a sawi a. “Fai duhna tak tak nunphunga kan lakluh loh chuan hnatlang bawk thin mah ila, a paihna tur ni lova bawlhhlawh kan paih zel si chuan kan fai kumtluan thei dawn lo a ni” a ti bawk.
Govt. GM HSS lecturer Dr. Charles Romalsawma pawhin Govt. GM HSS silver jubilee puala faina beihpui thlak chu tun atan chauh nilo, nakin zel thlenga chhawmnun a tul thu sawiin, silver jubilee chuan faina tluantling a thlen ngei a beisei thu a sawi.
Govt. GM HSS hi June ni 25, 1996 a din niin, zirlai 730 leh zirtirtu 27 an awm mek a. Arts, Science leh Commerce zirna bakah vocational course pathum – horticulture, health care leh computer technique te a zir theih a ni.
Silver jubilee lawmna pualin an sikul tualah Jubilee Tuichhunchhuah Rs 1,20,000 sengin an siam a. November ni 9, 2021 khan NSS-in thisen pek runpui huaihawtin unit 51 an pe bawk. Silver julbilee souvenir leh lungphun an buatsaih mek a, an ruahman dan chuan December ni 14, 2021 hian Silver Jubilee lawmna pui ber hman an tum a ni.