Parliament thlasik thutkhawm neih mekah nimin khan Rajya Sabha MP K. Vanlalvena’n African Swine Fever (ASF) vanga Mizoram tawrhna chungchang a sawi a. District 11-a khaw 271 ah ASF avangin vawk 29800 an thih tawh thu house hrilhin, ASF tuartute zangnadawmna pe turin sorkar laipui a ngen.
K. Vanlalvena chuan Mizorama AH&Vety department report sawiin, Mizorama district 11-a khaw 271-ah ASF avangin vawk 29800 an thih tawh thu leh hri kai rinhlelh Vawk 10380 tihhlum a nih tawh thu House a hrilh a. Vawk thi zawng zawng hlut zawng cheng vaibelchhe sang riat vel nia chhut a nih thu House a hrilh bawk.
Rajya Sbha MP K. Vanlalvena chuan “Hetiang zata tam mihring ran vulh thihna hi kuthnathawktu miretheite tan disaster leh natural calamity a ni” a ti a. ASF tuartute zawng zawng hnenah zangnadawmna pe turin sorkar laipui chu a ngen a ni.
Lok Sabha MP C Lalrosanga pawhin Ningani khan House-ah thusawiin, Mizorama COVID19 do kawnga theihtawp chhuahpui turin sorkar laipui a ngen a. COVID19 chi thar ‘Omicron’ laka inveng tur leh do tura India sorkarin thapui a chhuah tul thu a sawi bawk.
C Lalrosanga chuan Mzorama COVID19 kai kiam chak theilo leh state dang, a bikin hmarchhak state dangte nena khaikhina COVID19 kai zat a sang lam a la ni zel chu ralpui phiara phiarpuia, dopui turin sorkar laipui chu a ngen a ni.