Mizoram CSS Hindi Teacher Association (MCHTA) hruaitute chuan kum 2017-a an hna atanga bân an nih khan khatih laia eptu party, MNF-in sorkarna an chan hunah lak leh vek an nih tur thu tiam mah se sorkarna an chan hnu kum thum a pum dawnah pawh an thu tiam chu an la hlen lo tih an sawi a, ruai nawn leh ngei turin sorkar an ngen.
Centrally Sponsored Scheme (CSS) hnuai thawk Hindi teacher, an hna atanga bân tawhte hian Inrinni khan chanchinbumite an kawm a, an president Lalchhuanliana Parte chuan an hna atanga bân an nih lai khan khatih laia eptu party president leh hruaitu dangte khan an thlavang hauhin sorkarna an chan hunah an hna an hmuh let leh tur an hrilh tih sawiin, sorkarna an chan hnuah erawh court meuhin an hna ngai an thawh leh theih nana thutlukna a siam chu tihdanglamtir an tum ta thung tih a sawi.
MCHTA president chuan Congress sorkarin an mawhphurhna an hlen loh avanga an hna atanga bân an nih hnu kum 2018 khan high court-ah an zualko tih a sawi a, “October 21, 2021 khan court chuan kan chungchangah order a tichhuak a, sorkar advocate Pi Linda L. Fambawl chuan sorkar atanga thu a hmuh angin petitioner-te daih tawk post a awm thu a sawi a, court chuan Hindi teacher-te hi qualification an neih ang ang nen Samagra Shiksha Project hnuaiah re-engaged an nih tur thu a sawi ta a ni,” a ti.
Hetianga court order, thu lawmawm tak an dawn lai hian CSS Hindi Teacher-te ngaihsak em emtu nia insawi MNF sorkar chuan an advocate thusawi chu re-correction-tir tumin high court-ah thu an thlen leh ta niin Lalchhuanliana Parte chuan a sawi a, sorkarin hetianga a tih chhan hi an zinga a tam zawk untrained teacher an nih vang niin a sawi.
Lalchhuanliana Parte chuan untrained teacher an la nih reng chhan sawifiahin, “Supreme Court Order 2019-in Recruitment Rules (RR) a tihchhuahah ‘trained teacher’-te chauh classroom chhungah an lut tur a ni a. Untrained teacher la awm zawng zawngte pawh 2019 hmaa trained chhuak hman vek turin thu a chhuah a, chutih mek laiin keini CSS Hindi Teachers 2011-17 te chu a hun laiin duh mah ila trained phalsak kan ni ve lo,” a ti.
Court-in rawih nawn an nih leh tur thu order a chhuah tawh hnua an duh vang reng pawh ni lo, phalsak an nih loh avanga trained teacher an nih lohna remchanga hmanga rawih nawn an nih loh nana court order sorkarin tihdanglamtir a tum chu mihring dikna chanvo palzutna lian takah an ngai tih sawiin, CSS Hindi Teacher-te hmakhua ngai em em thintu MNF sorkar chu court order re-correct lova ruai nawn mai turin an ngen tih a sawi.
Sorkarin ruai nawn leh se untrained teacher an nih leh thei nan ruahmanna a siam thei reng tih sawiin, Assam sorkar pawhin dan tlawh chhan hmangin a state chhunga utrained teacher & un-qualified teacher-te training-na hun leh un-qualified teacher-te mahni an lo in-upgrade theihna atan kum nga hun relaxation pe turin central sorkar a ngensak tih leh phalsak an nih thu a sawi a, Mizoram sorkar pawh Assam-in a mite chunga hma a lak dan anga hma laksak ve turin an ngen tih a sawi bawk.