Thil dik lo titute hrem ngam an hun tawh
Sakawrhmuituai tlanga skywalk sakna tur sum leh, Chaltlang leh Durtlang inkara ropeway sakna tur sum tihchingpen nia lang chungchangah party lian pahnih inbeihna a na chho hle mai a, hetih lai hian party lian thar leh thawm na ZPM thalaite chuan CBI chhuitir ngei tur a nih thu an sawi ve thung a, boruak a lian chho zel dawn niin a lang.
Rorellai MNF chuan Lok Ayukta lamah chhui turin an thehlut a, Congress lam lahin chhui an cho viau bawk niin a lang a, an inbeihtawn chhoh zak zak lai hian ZPM lam pawhin ngawih bik an tum lo a, CBI chhui tura koh ngei tling leh chhuitir ngei an duh thu an aupui ve mek bawk. Thil engemaw dik lo lian tak chu a awm ngei tih a hriatreng mai a, pawisa tihchingpenna lian tham hi chu chhui fel thuai a chakawm hle reng bawk a ni.
ZPM thalai senior vice president Dr C Lalrammawia chuan, MNF-in Lokayukta-a FIR an thehluh chu hmai an phih faina maiah an ngaih thu sawiin, Lokayukta an ring lo tihna ni lovin, a hnu chhuitu atana home dept. hnuaia ACB an hmang tlat chu a dik lo an tih thu a sawi a, thudik hai lan a nih theih nan Congress-in an duh dan leh tourism minister ni mekin a lo intiam tawh angin CBI chhuitir ngei turin an phut tlat tih a sawi bawk a, rorelna dik duh theuh theuh an duh dan erawh a dang ta nuai mai a, chinfel thuai thuai a chakawm hle.
Sum fai tamna leh sum pawh engemawzah lokal tawh niin heng buainate hi a lang a, a buaina bul chinfel a, hmalak thuai thuai a, thil dik lo titute hremna pek thuai hi a tul a, kan ram politics dik lo siamtha tur chuan thil dik lo titute kan hrem ngam hi a hun tawh hle bawk a ni. Chutiang tur chuan politician huaisen leh dik kan mamawh chho telh telh dawn bawk.