- VL Rengi
Khawpui a ri dur dur a, kawl a thim khup khup a, eng mangkhengin kawl a rawn phe un un a, ring lutukin Tek tla in a chhunzawm bawk a. Hun rei lote hnu ah ruahpui vanawn nasa tak leh rial a rawn sur a. In chung rangva chu ring mangkhengin an rawn tlak ri thuai thuai a, beng a kiu deuh vung vung thei nia. In chung, meichhem avanga ung leh raw dum te chu rial denna avang chuan an rawn tla ur ur a. A chang chuan ruahsur chu thli na takin a rawn tawiawm thin bawk a. In te hi a sawi nghing lawp lawp thei a, in chung rangva te hi len khawkin khawlaiah a thlawk vu vu thei nia. Chutiang hunah chuan ka nu hian hlau em em hian “zah ngai, zah ngai” a ti thin a, kan hlau ve zo vek zel. Cowboy lukhum parh ang chi kha kan khum vata, tapchhakah mei kan chhema, mei lum kan ai a. Ruah a ban veleh pawnah tlanchhuakin huanpal in rial a dan khawm chu a san lam ka teh vat thin. Tichuan, chhum a rawn zinga. Chu chhum chuan tui a pai a. Thingrema thawmhnaw kan dahte pawh a hmuar zo vek thin a. Chhum chhah takin leilung a rawn tuam chuan, chhunah pawh thui a hmuh theih lova, torch light kan chhi lo chauh zel a ni e. Zanah phei chuan pawn hi a thim a ni satliah mai lova, a dum a ni deuh ber. Hmalam thui tak kan hmuh theih ngai loh avang leh torch light pawhin a chhun en thui theih loh avangin kawnga kan kal in midang nen kan insut chang a awm a, kawnga bawng bawk kan pala kan tluk nawk chang lah a tam. Van lam han hawi ila, thui kan hmu thei lova, ni hi hmuh chakin kan thlir vawng vawng a. Hawi hawi mah ila a awmna zawn awm ang pawh a hriat theih thin lo a.
Chu khua chu khaw mawng ping, kawng pui tawpna a ni a. TV en tur a awm lova, mobile phone a awm lova, dawr a awm lova. Khua a chhiat chuan khawlaiah thiante nen infiam a rem lova, sikul banah pawh inchhunga tawm deuh ngawr ngawr a ni mai. Chu khuaah chuan hmeichhe naupang niin kan khua bak khawdang ka hmu ngai lova, khawvel dang leh midangte, khaw dangte an awm ve tih chu ka suangtuah thiam riai ruai chauh a ni. Chutiang khawvel boring takah chuan tihtur a vang a. Khua a duai ang bawkin thinlung pawh a duai ruai thina. Tihtur dang awmta lo chu, lehkhabu bawm hai ka ching ta a. Cowboy bu atanga M & B, Sherlock Homes, comics, leh Pathian thu thlengin ka vaihma ta vek a. Chung lehkhabu zingah chuan Zoram Khawvel pawh a tel a. Zoram Khawvel hian ka chenna chhumzing phui mup atangin khawvel hmun hrang hrangah min hruai chhuak a. A changin Israel ah, a changin Burma (Myanmar) ah. Chu lehkhabu avang chuan Mizo ka ni leh Mizoa ka lo piang hi ka lawm veng veng a, ka nihnaah ka chian phah ve tlat. Khawvawt leh chhumzing bihruksan nan a hmanga, a chenna khawte takte leh chhumzing chuan a hual chep zo ta lova. Suangtuahna khawvel ram zauah chintawk nei lovin a hleuh kuala. Volume tin a chhiar a, sherlock homes nen khan exam laia chhiar nuam a tizual thina. Bu khat a chhiar zawhin a dang lo chhuak leh tur a nghakhel hle thin.
Hun leh nite an lo liam zela, chu hmeichhe naupang pawh chu puitling a lo ni ve ta. Lehkhabu kaltlanga a hriat Mizoram pawn ni si Zoram Khawvel chu a tak ngeiin a pal ve ta a. Myanmar-a a awm laiin Pu Keivoma te nena inkawm ngeih tak, Pu M.C. Lalrinthanga te thian ho nen intawngin thian tha tak an ni chho ta nghe nghe a. Khawvel changkanna zar zovin Pu Keivoma nen ngei pawh Facebook lamah te an inhre ve tan a. Mahse, vanduaithlak takin Pu Keivoma hi a dam loh avangin a kawm ve hman tak tak ta lova. Pu MC-a nen hi chuan inkawm chho zelin chhaklama Zofate harsatna tawh sutkian puina tura hma a laknaah te pawh an intawiawm chho zel a. Pu MC a hian a thianpa ber Pu Keivoma dam loh vanga hrehawm a tih thu te phone ah a sawi kuang kuang a, tawngtai puive turin a ngen nghe nghe a. Hetiang anih vang hian thih thu a hriat pawhin a rilrua awm hmasaber chu Pu MC a hi a ni a. Hnem ngai mihring a ni. Phone in a va be chhuak ta nghe nghe a, chuta tang chuan he Article pawh hi Pu Keivoma ui nan, thlah nan leh Pu MC a hnem nan a rawn chhuak ta a ni e.
“A sakruang Piallei daiah zal mahse,
A thaikawi biahthu hmangin,
Kan thinlungah a nung reng ang.”