Tanzania ram atanga Delhia thlawk lut mipa kum 37 chu Lok Nayak Jai Prakash Hospital (LNJP)-ah Pathianni khan dah luh a ni a, ani hi Covid-19 variant thar, Omicron kai niin India-a he hri kai mi pangana a ni.
Damlo hian natna lang chhuak nasa vak lo a nei a, amah hi invenna damdawi a bikima la tawh a ni tih LNJP Hospital Medical Director Dr Suresh Kumar chuan a sawi tih news agency-ten an tar lang.
“National Centre for Disease Control-ah sample 12 thawn a ni a, heng zinga pakhatah hian Omicron variant hmuh a ni ta a. A kai hi Indian niin Tanzania atanga tun hnaia lo haw kha a ni,” tiin news agency PTI chuan sorkar hotu pakhat sawi a tar lang bawk.
“Damlo thlen chin hi chhui zui nghal niin a mi lo hnimhnaih tawhte pawh chhui zui mek a ni,” tiin a sawi bawk.
India-a Omicron kai hmuh hmasak pahnihte chu kar kal ta tir lam kha niin Karnataka-ah a ni a. A hnuah Gujarat leh Maharashtra-ah hmuh an ni leh bawk.
Omicron hi November 25-a South Africa-a hmuh chhuah kha niin World Health Organization (WHO) chuan ‘variant ngaihven ngai’ huanga a dah a ni.
WHO hian ram tinte chu invenna damdawi pek tichak lehzual tura tiin damdawi in leh a hmanruate pawh inbuatsaiha tichangtlung turin a ti a. “Omicron hi rinphak bakin a hmaa mite atanga insiam danglam nasa a ni a, hripui leng mekah hian chhiatna nasa zawk thlen thei a ni,” tiin WHO chuan a sawi.
Hri chi thar avang hian India pawh a fimkhur hle a. International airport zawng zawngah ram dang atanga thleng tharte chu uluk taka an chinchang zawtin ‘hlauhthawnawm ram’ a tih atanga lutte phei chu endik vek an ni.
Sorkarin kaihhruaina a siam angin heng ram atanga thlengte hi RT-PCR hmangin an lo thlen veleh endik an ni a. An kai lo tih a chian hma loh chu tumhmun chhuahsan thei an ni lo.
India-in ‘hlauhthawnawm ram’ a tihte zingah hian United Kingdom, Europe khawmualpuia ram 44, South Africa, Brazil, Bangladesh, Botswana, China, Mauritius, New Zealand, Zimbabwe, Singapore, Hong Kong leh Israel te a tel.
Hetih lai hian Omicron variant hi hmuh chhuah hlim mai a la nih avangin eng ang chiah nge a nih hriat theih a la tlem hle.
Mi thiamten an zir chiang mek a, a hlauhawm dan, inkai a awlsam dan, thihpui mai theih a ni em, tuna khawvelin invenna damdawi a neihte hian a veng thei em tih zawng zawng pawh hriat theih a la ni lo va; mahse, inkai erawh a hmaa mite aia awlsam leh hri lo kai tawhte pawhin an kai leh mai theih ang erawh chuan hriat a ni.
Delhi-a Omicron variant kai hmuh a nih rual hian Health Minister Satyendar Jain chuan Pathianni khan a sorkar chuan ram dang nena intlawhpawh (international flight) chu sorkar laipuiin khap se a duh tih a sawi chhuak zui nghal.
Delhi Chief Minister Arvind Kejriwal-a pawhin Twitter-ah ram dang atanga luh theihna chu khar leh a duh thu a tar lang a, Prime Minister Narendra Modi hnenah pawh khar leh tura ngenna lehkha thawnin khawpui chu a tuar leh ber tur an nih thu a sawi.
Health minister Jain hian international flight khap leh rih chu ram chhunga Omicron variant darh zel tur venna atana tha ber a nih thu a sawi.
“Omicron hi a pian (darh) hun atana a insiam lai a ni a, hemi awmzia chu a kai hi tumhmunah hian hmun lohvin an tlang thei dawn tihna a ni,” tiin Jain-a hian a sawi tih PTI chuan a tar lang.
“Tuna a kai kan hmuh tawhte hi a kai awm tawhna ram atang zel a la ni a, sorkar laipui hian a ngaihven ran a ngai hle a ni,” a ti bawk.
Jain chuan hmai tuamna pawimawh thu sawiin, “99%-in hmai tuam hian Covid-19 variant hrang hrang – Alpha, Beta, Delta leh Omicron pawh ni se, min veng thei,” a ti.
“Mi thiamten thawh thumna hi January-February vel an ring a, hei hi mi tinin hmai kan tuam a nih chuan kan veng thei ang,” a ti bawk.
Jain-a hian Delhi-a invenna la thei zinga 90% chuangin dose khat tal an la tawh a, 60% chuangin a kimin an la tawh niin a sawi a. La la lote la zel turin a sawm zui a ni.