Lungleia RT-PCR laboratory din tura YMA Sub-Hqrs., Lunglei, kaihhruaina hnuaia hma lakhona Joint NGO atangin RT-PCR Lab for Chhimbial an inhnukdawk.
RT-PCR Lab for Chhimbial Convener Jimmy L Sailo chuan, “Lungleiah RT-PCR khawl bun thuai a nih theih nan Jt NGO hminga hmalakna kalpui tha niin kan hria a, a tirah kan beiseina sang tak pawh kan nei. Mahse, Mizoram sorkar insawifiahna ngaihthlaka pawmsak zel a, ngaihchan zel ringawt hi kan duhkhawp loh avangin Jt NGO kaihhruaina hnuaia hma lakhona atangin kan inhnukdawk ta a ni,” tiin The Zozam Times zawhna a chhang.
Jimmy L Sailo chuan Lungleia RT-PCR laboratory bun thuai a nih theih nan chak zawka hmalak an duh thu sawiin, “Tunah hian bungrua kan chah an ti a. Kumin September atangin Tourist Lodge buatsaih nia an insawi atang khan bungrua chaha hmalak chhoh ve awm tak a nia. An peih hnuah hma an lak chauh avang hian tihkhawmuan dan an zawng tih hi a lan dan a ni,” a ti.
“Chuvang chuan, Jt NGO ang ni lovin kan hmalak thiam dan angin hma la mai teh ang u tih kha kan pawlin kan sawiho dan chu a ni,” a ti.
Mizoram chhim lam district te tana RT-PCR laboratory din a nih theih nana YMA Sub. Hqrs Lunglei kaihhruaina hnuaia hmalak hona Joint NGO atanga an inhnuhdawh hnuah, RT-PCR Lab for Chhimbial chuan an hmalak zel dan tur an la sawiho loh thu Jimmy L Sailo hian a sawi a. “October thlaa peih fel hman tur an tih hnuah November min nghahtir leh a. Tunah November a zo a, Krismas hmain an ti leh a. Tawlh zel kha a buaithlak kan ti a. Chuvangin, ‘hmalak dan a tha zawkin la ngaihtuah tha leh deuh ang u’ kan ti a ni,” a ti bawk.
November 30, 2021 khan Sub-Hqrs YMA Conference Hall, Lunglei-ah Tourist Lodge Lungleia RT-PCR laboratory ruahman mek chungchang sawi ho a ni. He hunah hian Mizoram sorkara Health department hmalak tawh dante sawiin Dr Eric Zomawia, Director, National Health Mission chuan, November thla chhungin Lungleiah RT-PCR khawl bun hman turin NGO te’n ngiat mah se peih hman a nih loh thu a lo sawi tawh a. He thutkhawmah hian Lunglei-a tlawmngai pawl hrang hrang te leh chanchinbu mi te sawm an ni a. YMA leh MHIP aiawhte leh media mi thenkhat an tel laiin, RT-PCR Lab for Chhimbial leh Lunglei |halai Pawl aiawhte an inlan ve lo thung.
Hetihlai hian, November 6, 2021-a Lunglei-a NGO Co-ordination committee thukhawm chuan kumin November thla chhung ngeia Lungleia RT-PCR khawl bun fela thawktu pawh dah nghal tura ngiatin sorkar ngaihchan nise an ti a. Hemi chhunga sorkar hmalakna lungawithlak leh pawmawm a awm lo a nih chuan hmalak zel dan tur ngaihtuah leh nise tiin an lo rel tawh a ni.