Mizoram sorkarin State Disaster Relief Fund (SDRF) atangin Covid-19 vanga nunna chân mi 308 chhungte hnenah zangnadawmna Rs nuai 154 a pe chhuak tawh.
Disaster Management & Rehabilitation department hotuten The Zozam Times an hrilh danin, district 11 zinga zangnadawmna pek chhuah tam berna chu Aizawl district niin, Covid 19 vanga nunna chân mi 205 chhungte hnenah Rs 50,000 theuh, a vaiin Rs 1,02,50,000 pek chhuah a ni tawh a ni.
A dawttu, Kolasib district chhunga Covid-19 vanga thi mi 22 chhungte hnena zangnadawmna pek chhuah chu Rs 11,00,000 a ni. Lunglei district-ah nunna chân mi 19 chhungte hnenah 9,50,000, Lawngtlai district-ah nunna chân mi 16 chhungte hnenah Rs 8,00,000, Serchhip-ah nunna chân mi 11 chhungte hnenah Rs 5,50,000, Siaha district leh Champhai district-ah nunna chân mi 10 chhungte ve ve hnenah Rs 5,00,000 pek an ni.
Heng bak district dangah chuan zangnadawmna pek hi a la tam lo hle a, Khawzawl district-ah nunna chân mi pathum hnenah Rs 1,50,000 pek chhuah a ni tawh a, Saitual district-ah mi pahnih hnenah Rs 1,00,000 leh Hnahthial district chhungah mi pakhat chhungte hnenah zangnadawmna Rs 50,000 pek a ni tawh bawk.
Supreme Court thuchhuak leh National Disaster Management Authority (NDMA) leh Ministry of Health & Family Welfare-in inkaihhruaina a siam angin Mizoram sorkar chuan Covid-19 vanga nunna chân chhungte hnenah zangnadawmna Rs 50,000 a pe chhuak a, zangnadawmna dawng tur hian district tin DC hnenah dilna thlen a ngai a ni.
Mizoram pumah nimin tlai dar 5 thleng khan Covid-19 kaihhnawihah mi 504-in nunna an chân tawh a, chung zinga zaa 61 chhungte chuan zangnadawmna hi an dawng tawh a, a bak zaa 38-in an la dawng lo a, zangnadawmna dawng thei district thuneitute hnena dilna pe lut tawh eng emaw zat an awm a ni.