Covid-19 hri thar, Omicron laka invenna tura sorkar laipuiin state tin leh UT te tana inkaihhruaina a siam chu hmaih nei lem loin Mizoramah pawh a tul anga kalpui mek zel a ni.
December 4, 2021 khan Union Health Secretary Rajesh Bhushan chuan state panga – Odisha, Karnataka, Kerala, Tamil Nadu leh Mizoram, bakah Jammu & Kashmir Union Territory te chu an state chhunga ni tina Covid-19 hri kai thar pun chak avang leh thihpui zat bi (mortality rate) a san avanga chak zawka hma la tur leh, Omicron variant hlauhawm dan te, a bik takin ‘at risk’ ram atanga India rama khualzin lo lutte uluk taka thlithlai tur leh Covid-19 kai zawng zawngte sample genome sequencing ti tura thawn turin a hriattir a ni.
The Zozam Times zawhna chhangin Dr Pachuau Lalmalsawma, Mizoram sorkar aiawha Covid-19 chungchang puangtu, state nodal officer ni bawk chuan, “Sorkar laipuiin state tinte tih tur leh inkaihhruaina a siam chu tha taka kalpui a ni a. A tul anga hmalak chhoh zel a ni,” tiin, a bik takin thlawhna tumhmuna ram dang atanga khualzin lutte dawnsawn dan turah Chief Secretary Dr Renu Sharma, IAS te nen an sawiho tawh thu a sawi.
“Sorkar laipuiin Omicron laka invenna tura state tinte tana inkaihhruaina a siamah ram pawn atanga lo thlengte chu quarantine nghal tura tih an ni a. Ram pawn atanga an rawn thlen atanga ni riatnaah RT-PCR test a ngaih dawn avangin, tunah hian inkhung hranna tur hmunte buatsaihin hmalak mek a ni,” a ti.
Dr Pachuau Lalmalsawma chuan tumhmunah ram dang atanga khualzin lutte a hranpaa information lak niin chhinchhiah an nih thu a sawi a. Chanchin kimchang ziahna, ‘Air Suvidha’ kaltlangin ram dang atanga lut tur hriat lawk theih dan awm mah se, Mizorama biakpawh theihna tur phone number dah a nih thin loh avangin harsatna an tawk deuh nia sawiin, “Foreign number te, international leh an awmna phone number te chauh an neih thin avangin biakpawh zung zung an harsa a. Hei hi chu keini chauh pawh ni lovin state dang zawng zawngte harsatna tawh thin a ni. Chuvangin, sorkar laipuiah local phone number pek vek theih dan tur ngaihtuaha hma la turin kan thlen tawh,” a ti bawk.
Covid-19 kai zawng zawngte sample genome sequencing ti tura thawn tura tih chu tuna kalpui sa reng a nih thu Dr Pachuau Lalmalsawma hian sawiin, “Omicron variant ang pawh ni chuang loin Covid-19 huam vek thei turin thawn a ni sa hrim hrim a. Mahse, tun hnaiah khatiang a lo nih tak avangin a bik taka thar thawh leh kha a ni mai,” tiin The Zozam Times a hrilh.
Covid-19 hri kai leh mortality rate-ah Mizoram hi sang fal anga lang hi chhan hrang hrang a awm thu a sawi a. Chumi piah lamah sorkar laipuiin hri kai awmna khua/vengte vil uluk tura a hriattir a nih chungchangah pawh hian an kalpui sa reng a nih avangin, Mizoram dinhmunah engmah lungkham thar viauna chhan tur a awm lem lo nia sawiin, “Omicron hi thil thar a nih avangin sorkar laipuiin a ngaihven a, a ngaihsak a, state tin khan kan tih tur tete ti tura inkaihhruaina a siam kalpui kha a ni deuh ber mai,” a ti.
Awmze nei lem loa Omicron hi hlauh chiam tur pawh a nih loh thu sawiin, “A tel lo pawhin Covid-19 avang hian harsatna kan la nei zel hrim hrim a. Mipui kan fimkhur loh a, kan pawlawh hun hun hi kan chet chhiat hun a ni mai,” a ti a. Invenna awlsam tê awmte chu tha taka zawm mai a him nia sawiin, “Eng ang Covid-19 variant thar pawh lo awm mah se, invenna leh kan tih tur kha a ngai tho a ni a. A dang a awm chuang lo,” tiin, ‘Pathian biak inkhawmnaa zai te, ruai theh te hi a la hun lo e’ tih a ni chung pawha palzam a nih chuan hri leng vanga tawrhna nasa zawk cho chhuah a hlauhawm thu a sawi bawk.