Aizawl: North East Students’ Organisation (NESO)-in nimin khan state hrang hrangah India sipaiten Nagaland Mon district-a pawisawi lo tual chhung mi an pawngkah avanga thite sunna leh Armed Forces Special Power Act (AFSPA) 1958 duh lohna lantirna hun an huaihawt a. Mizoramah pawh MZP Conference Hall, Aizawlah he hun hi hman a ni.
MZP President Lalnunmawia Pautu-in tun December 4-a sipaite fimkhur loh avanga Nagaland Mon district-a Oting khuaa pawisawi lo mi 14-in nunna an chân chu pawi an tih thu a sawi a. “Mipuite laka sipaiten hlei an len nawn tawh lohna turin AFSPA hlih ngei chu MZP duh dan a ni,” a ti.
Hmarchhak mipuite himna tura AFSPA hlih chungchangah a tul anga hmalak chhunzawm a nih tur thu MZP president chuan a sawi a. Mizoramah pawh AFSPA chu hlih a la ni lo tih sawiin, MZP leh NESO-in AFSPA hlih a nih ngei theihna turin hma a la zel dawn tih a sawi bawk.
NESO Finance Secretary Ricky Lalbiakmawia pawhin, “India hian a khua leh tui tak tak anga min en dawn a nih chuan AFPSA hi a hlip ngei tur a ni,” a ti a. Nagaland-a thil thleng chu a lungchhiatthlak thu leh thleng nawn tawh lo tura an duh thu a sawi.
Nagaland-a thil thleng kaihhnawihah MZP chuan 23rd Sector Assam Rifle DIG Brig. Digvijay Singh hmuin, Nagaland Mon district-a thil thleng ang chu Mizorama a thlen ve ngai lohna tura intiam tur leh hetiang thil hi hmarchhak pum puiah thleng nawn tawh lo tura hma la turin an phut a. DIG chuan Mizoramah hetiang thil hi a thlen ngai loh tur thu a lo tiam bakah hmarchhak hmun dangah pawh thleng nawn tawh lo tura theihtawp a chhuah tur thu a sawi niin MZP thuchhuahin a tar lang bawk.