Auto Corner
by Ruata
Nov.-a India-a passenger car hralh tam zual te
Top 25-a lirthei 11 lai mai neitu Maruti Suzuki chuan thla hmasa bik khan lirthei hralh hnem ber company nihna a la a, passenger car hralhchhuah zawng zawnga zaa 55 chu thla hmasa khan Maruti Suzuki lirthei a ni
Passenger car huangchhungah India ram pumah thla hmasa khan lirthei 2,45,262 hralhchhuah a ni a, hei hi nikum nena khaikhin chuan nikum a pha lo hret a, nikum aiin lirthei hralh zat hi zaa 14.3 in a tlahniam a ni. India rama lirthei hralhchhuah zat a tlakhniamna chhan hi semiconductor duh khawp hmuh loh vang kha a ni deuh ber a, hei hian lirthei siamchhuah leh supply lam thlengin nasa takin nghawng tha lo a nei.
India rama lirthei hralhchhuah tam lamah hian tun tumah pawh hian a ngai te bawkin Maruti Suzuki chuan dinhmun tha ber an hauh leh a. Lirthei hralh tam zual 25 zinga 11 chu Maruti Suzuki lirthei a ni a, a dang zawngah chuan Hyundai, Tata Motors leh Mahindra lirthei te chu hralh tam zual an ni bawk.
Maruti Suzuki WagonR chu November thlaah khan passenger car hralhchhuah hnem ber niin 16,853 hralhchhuah a ni a. Nikum November thla nena khaikhin pawhin Wagon R hralhchhuah zat punna hi zaa 3.67 a ni. Wagon R dawtah hian Maruti Suzuki Swift awm lehin pahnihna dinhmun a rawn hauh a. Thla hmasa chhung khan 14,568 hralhchhuah a ni a, nikum November thla nena khaikhin erawh chuan hralh zat hi zaa 21.25 in a tlahniam a ni.
Maruti Suzuki Alto chu pathumna niin 13,812 hralhchhuah a ni a, palinaah Maruti Suzuki Vitara Brezza a awm leh a hei hi 10,760 hralhchhuah a ni thung a ni. Top 5-a Maruti Suzuki lirthei ni lo awmchhun chu Hyundai Creta niin 5-na dinhmun a hauh a, 10,300 hralhchhuah a ni.
Top 25-a lirthei 11 lai mai neitu Maruti Suzuki chuan thla hmasa bik khan lirthei hralh hnem ber company nihna a la a, passenger car hralhchhuah zawng zawnga zaa 55 chu thla hmasa khan Maruti Suzuki lirthei a ni. An lirthei dang hralhchhuah zing-ah hian Maruti Suzuki Dzire (8,196 units), tlangzarh thar Celerio thar (5,968 hralh), S-Presso (3,661 hralh) leh XL6 (3,280 hralh) te chu India rama passenger car hralh tam zual 25 zinga lang phak dangte an ni.
Hyundai, Tata leh Mahindra in a bakah dinhmun tha an luah leh a. Hyundai leh Mahindra in top 25 zingah lirthei 4 ve ve an nei a, Tata Motors in pathum an nei thung a ni. Top 5-a Hyundai Creta lang ve tihloha Hyundai lirthei dang hralh that zual te chu Venue, Grand i10 Nios leh i20 te an ni a. Venue bik hi India ram puma SUV hralh that zual top 3 a lang phak a ni a, passenger car hralhthat 25 bikah hian a 12-na a ni thung a, Grand i10 Nios hi 16-na niin i20 hi 20-na a ni thung.
Tata lamah chuan Tiago chu 18-na a ni a, tunhnaia tlangzarh thar Tata Punch chu 14-na niin Punch hi thla hmasa khan 6110 hralhchhuah a ni a, Tiago chu 4998 hralhchhuah a ni thung a ni.
Passenger car hralhchhuah tam zual 25 zinga Mahindra lirthei lang ho hi Bolero, Scorpio, XUV300 leh XUV700 te an ni a. Bolero chu Mahindra lirthei zinga hralh hnem ber niin 5442 hralhchhuah a ni a, 17-na a ni. XUV300 (4,005 hralh) chu 21-na a ni a, Scorpio (3,370 hralh) chu 23-na niin XUV700 (3,207 hralh) chu 25-na a ni thung a ni.
Lirthei company dang top 25 a lang zingah hian Kia leh Toyota pawh an tel a. Kia Seltos chu top 10-ah a lang phak a, Kia Sonet (4,719 hralh) pawh 19-na a ni. Toyota Innova Crysta chu 6,300 hralhchhuah niin thla hmasa khan lirthei hralh that 13-na a ni phak bawk.
SUV leh hatchback India ramah hmingthang
Tunhnaiah India ramah SUV huang lirtheite hi hralh an kal em em mai a, compact SUV a ni emaw, midsize SUV a ni emaw, SUV huanga lirtheite hi thla hmasa pawh khan lirthei hralh tam ber a ni a. Top 25 list-ah hian SUV huanga mi, compact leh midsize SUV huanga mi 11 lai a tel nghe nghe.
A bak dangah hian lirthei te, hnung bul tia sawi theih mai, hatchback te hi lirthei lei tam ber a ni leh bawk a. Hatchback pawh hi chi hrang hrang awm vein a man tlawm lam entry-level te, to hret leh lian hret ‘midsize’ bakah changkang leh to leh hret ho ‘premium hatchback’ te chu hralh hnem berte zinga mi a ni bawk.
Multi Purpose Vehicle (MPV) kan tih huanga mi pathum a tel bawk a, Maruti Suzuki Dzire hi sedan (compact sedan huanga mi a ni) huanga lirthei lang ve awmchhun a ni a, Eeco chu ‘van’ huanga lirthei lang awmchhun a ni bawk a, MPV emaw MUV emaw huangah te pawh Eeco hi chu an dah thin tho bawk a ni.