ZPM Leader Lalduhoma’n ZPM-in sorkarna an chan chuan sorkarin development bank a din dawn niin a sawi a. “Puih tlakte chu loan pung awm lo chi te, a pung tlem chi te pein sorkar chu guarantor-ah a tang ang a, tih takzeta dinchhuah tumte chuan an hlawhtlinpui em em ang,” a ti.
ZPM Sikpui Fehchhuah kal mekah ZPM leader chuan he thu hi nimin khan Siaha-ah a sawi a. ZPM chuan sem policy tha an tih loh thu sawiin, “Sem policy hi Bible zirtirna kalh a nih avangin kohhran hote pawhin tha lo an ti,” a ti a. Bana kaih (hand holding) policy hmangin dinchhuah tuma beitu tak takte party thliar lovin sorkarin an dinchhuah theihna turin a tanpui dawn niin a sawi.
Lalduhoma chuan, “ZPM chu kalphung thar – mipui sorkar zuartu kan nih avangin party inthliarna hi kan ti ve thiang lo,” a ti a. Ruling party leh ruling party ni lo thliar chu kalphung thar – mipui sorkarah chuan a awm ve loh tur thu a sawi.
ZPM leader chuan Mara Autonomous District Council (MADC)-a BJP sorkar chu MNF sorkarin kawng hrang hrangin a hrek nasa niin a sawi a. ZPM-in sorkarna an chang ve a nih chuan autonomous district council leh VC/LC-ah pawh an party sorkarna leh party dang sorkarna an thliar ve loh tur thu leh party inthliarna chu ramhlui zia a nih thu a sawi bawk.