HNA HNIAM BIK A AWM LO

  • Nawlchunga Chinjah

A tehtu a zir ten, a buktu a zir ten, a hmutu leh a hretu a zir ten, a thlirtu leh sawitu a zir ten ropuina kan tih te, hausakna kan tih te, hlawhtlinna kan tih te, hmasawnna kan tih te, dikna leh rinawmna kan tih te, hruaitu ropui kan tihte, zaithiam kan tih te, thusawi thiam kan tih te, fel kan tih leh entawntlak, chhuantlak leh faktlak kan tihte hi a dang thei viauin a rinawm a, chu mai pawh ni lovin, a buk a dik leh dik loh chungchangah te, thil dik a nih leh nihloh chungchangah te, thil sual leh sual lo chungchangahte, a that leh thatloh chungchangah te pawh ngaihdan leh thlir dan, pawm dan leh hmuh dan te a inang lo thei viauin a rinawm bawk. Siamtu ina min siam dan pakhat ve reng ni miau hek le.
Chutiang ang chu ni mah se, pathian thu atang te leh, kan mihring ngaihdan leh hmuh dan atang ringawt pawn, mi zawng zawng ngaiha thil dik ni lo, thil tha ni lo leh sual erawh chu a awm tho a. Sawi hran pah pawh ngai lovin kan hre tlang mai awm e. Chutiang thil tih lohah chuan, thil thuhmunah pawh tute emaw nena kan ngaihdan hi a hrang fo vin, a danglam fo thin ang a, kan thil thlir dan leh hmuh dante pawh a thuhmun ngai hek lovang. Thenkhatin, engahmah an ngaih lemloh thilte pawh hi thenkhat erawh chuan an ngai pawimawhin, an ngai thutak viau thin ang a, thenkhat tana thil pawi ni lemlo kha thenkhat tan erawh thil pawi tak a ni fo thin ang a, thenkhat ngaiha thil hlu ni lo kha, thenkhat tan erawh thil hlu tawpkhawk a ni thung ang. Chutiang zelin a dang pawh.
Thil mawina chu a hmutu mitah a awm, an tih ang chiahin, engkim mai hi a tehtu, a thlirtu, a siamtu, a buktu leh ngaihdan siamtu thinlungah a innghat ti ila a sual awm love. Mit pahnih nei theuh ni chung si a, hmeltha kan tih zawng, a mawi kan tih zawng, hmuhnawm kan tih zawng, nalh kan tih zawng a inan loh theih thin dan atang ringawt pawh hian ngaihdan siamtu, thuthlukna siamtu mihringah engkim mai hi a innghat a ni tih a dikzia chu a lang chiang viau awm e.
Chutiang ang chuan, thil engkim mai nihphung hi a tehtu leh thlirtu thinlung lamah a innghat ti mah ila, he khawvelah hian engmah ni lo leh hlutna neilo erawh chu an awm hauh lo thung a, tangkaina nei reng renglo engmah a awm hek lo. A tangkaina tur leh a pawimawhna tur kan hriat miah loh tur thilnung atanga thil nung lo thleng hian, tangkaina mual mual, pawimawhna mual mual, hlutna mual mual an nei vek mai.
A dawngsawngtu rilru, thinlung leh ngaihtuahna a dik tawk thin loh avang zawkin, mite ngaiah thil ropui tak leh hlu tak ni si te hi, thil ho tak angah leh engmah ni lo ang ah, thil te tham tak angah kan ruat mai thin zawkte hi a lo ni fo mai.
Chutiang ang chuan, kan thlir dan, kan teh dan a zirin thil engkim nih phung mai piah liamah, an hlut dan leh an hlut loh dan te, an tangkai dan leh tangkai loh dan te, an pawimawh dan leh pawimawhloh dante hi a innghat ti mah ila, kan hriatreng tur atana duhawm em em mai chu, eng thil mah hi te fal bik leh te lua a awm lo tih hi a ni.
Vawiina ka sawi duh ber erawh, hnaah eng hna mah te fal bik, hnuaihnung bik, zahawm lo bik leh, hna chhe bik a awm lova, eng hna pawh ni rawh se, a thawktuin phur tak leh nuam ti taka a thawh theih phawt chuan chu hna chu hna zahawm a ni mai a, hna sang tak leh ropui tak a ni mai a, hna duhawm tak leh awhawm tak a ni mai tih hi a ni.
Kan mamawh kan hmuhna tur, kan ei hmuhna tur a nih phawt chuan eng hna mah hi i thawk hreh lo ila, taihmak i zir tlat ang u. Thil dangah chuan a hniam fal bik leh a ropui fal bik a lo awm pawh a ni mai thei e, mah se, hnaah erawh a hniam fal bik leh a ropui fal bik a awmlo tih hi keini thalaite hian hre thar ila, hna thawh duh zawng leh duh loh zawng neihloh hram i tum ang u. Kan tui loh deuh zawng hna pawh ni se, thawh a ngai a, kan thawk ta a nih pawn phur tak leh tha tho taka thawh i tum tlat thin ang u, chu chuan hlawhtlinna tlangchhipah min lawnchhuah tir dawn si a.
Phurna leh tha thona nen, tuina leh lungawina nen mahni hna thawh tum mi nih tum tlat ila, chutiang bawkin, kan hmaa hna thawh tur awm ang angte thawh i tum tlat bawk ang u – a bikin thalaite hian.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427