Sub-committtee on Quality Control of Cement & Iron Rod-in nimin khan Aizawla iron rod zawrhte an endik a. Iron rod brand tam tak chuan a zuartuten a size nia an sawi a tling pha lo nasa hle tih an hmuchhuak.
Bureau of Indian Standards (BIS)-in iron rod-te chu a size azirin a sei lam inang (12 meter)-ah a rih zawng tur bituk a nei a. Aizawla iron rod tam tak chu a size a tlin loh avangin buk a tling thei ta lo niin a endiktute chuan an sawi a. Hei hi a chhan ber chu buk lova a mal (piece)-a an hralh vang leh a leituin buktir nachang an hriat loh vang niin an sawi.
Iron rod 20 mm tlawn khat, a rih zawng tur kg hnih chuanga tling lote pawh hmuh chhuah a nih thu a endiktute chuan an sawi a. Rod size hisapa structure engineer-ten in sak turte an design thin avangin rod size dik lo chuan chakna a hloh dawn a, in sak pawhin a tuar nasa thei hlea an rin thu leh a rih zawng hisapa a man chhiar a nih vangin a piece-a leituin an hloh nasa tih pawh an hmuh chhuah thu an sawi.
Controller of Legal Metrology-in iron rod zuartute chu bukna kawl vek tur leh a leituin a duh chuan buksak ngei turin hriattirna chhuah tawh mah se, a mal (piece)-a zawrh chu dealer-ten an intihhmuh a, a size tling lo thlengin a hluar chho ta zel nia a lan thu endiktute chuan an sawi.
Aizawla iron rod zawrhte chu December 2 khan endik a ni tawh a, nimina endik lehnaa mante nen vawi hnih endikah Aizawla dawr 61 atangin iron rod kg 5,29,000 kg vel an man a ni.