CK Hyundai 17th Mizoram State Muaythai Championship 2021 chu Zirtawpni khan Ramhlun Boxing Hall-ah khelh zawh a ni a. A pumpuiah medal 16 la in SPES Gym an champion.
Champion team hian gold medal 8 la in, silver medal 6 leh bronze medal 2 an la a. Pahnihna Alpha Gym chuan gold 8, silver 5 leh bronze medal 2 an la a. Pathumna Main Training Centre (MTC) chuan gold 3 leh silver 3 an dawng.
Lawmman dang semah Best Discipline Team-ah Vairengte Muaythai Club te thlan an ni a. Best Fighter-ah George Lalmuanawma, Chawnpui, SPES Gym chu thlan a ni bawk.
Mizoram State Muaythai Championship hi club inelna a ni a, district hrang hrang atangin club 7 telin players 70 an inlan thei bawk. Mizoram State Muaythai Championship a ti tha te hi National Muaythai Championship Imphal-a neih turah Mizoram aiawhin an kal ang.