Mizoram Zirlai Pawl (MZP) chuan kum 2021 atana Pisapui kharna hun nimin khan an hmang a. National leh State Award for Teacher leh National Defence Academy (NDA)-a Mizo tling tharte chawimawina hun an hmang nghal bawk.
MZP President Lalnunmawia Pautu chuan thu sawiin, “Mizote tihmingthaa chawimawi tlak leh phute chu MZP chuan a chawimawi thin a, chutihrualin ram leh hnam tan do ngai chu a do mai thin a ni. Vawiina kan chawimawite hi MZP chuan kan hre reng dawn che u a, kan en zui reng dawn che u,” a ti.
Hmun hrang hranga Zofa awmte tan MZP-in theihtawp a chhuah thin thu Lalnunmawia Pautu chuan a sawi a. Tuna Assam state huam chhunga awm mek, Mizorama rin luh phuta hmala mektu Thangram Indigenious People Movement hruaitute hmalakna an thlawp tlat thu sawiin, Mizo mipuite pawhin theihtawp chhuaha tanpui turin a sawm.
He huna khuallian, Lalnunmawia Chuaungo, CIC pawhin thu sawiin, “Zirna hi ram leh hnam hmasawnna atana inchher chhuahna pawimawh ber a ni a, uar lehzuala zirna kan kalpui a ngai,” a ti a. “Vawiina chawimawina dawng zawng zawngte ka lawmpui em em che u rualin, mi dang tana entawn tlak ni zel turin leh Mizoram tithangmawitu ni zel turin duhsakna ka hlan che u a ni,” a ti.
MZP chuan NDA tling thar a chawimawite chu Dayne Thiamsangliana s/o Lalhmingsanga leh Lalrindika s/o Dr. Lalrohlua te an ni a. National Award to Teacher Jacinta Vanlalengzami, A&M Grandchild School, N. Vanlaiphai. State Award to Teacher C. Lalhluna Headmaster, Govt. Bethlehem Vengthlang H.S; Rosangzuala Ralte Headmaster, Govt. Edenthar M.S leh Vanlalthangi Headmaster, Govt. Electric P.S-II, Lunglei te hnenah chawimawina thuziak a hlan a ni.
MZP Pisapui hi kum thar January 13, 2022 hian hawn leh a ni ang.