Mamit district-a Sihthiang khuaa ni hnih awh, State level Hodaigri Festival chu nimin khan a tiak a. A tiak ni hian Minister of State Robert Romawia Royte-in a telpui.
Festival hi Mizoram Bru Cultural Organisation bultum niin, Bru hnamten kumtluana tluang taka hna an thawh avanga an lawmzia lantirna atana an hman niin, tun tum hi vawi hnih an hmanna a ni a, a vawi khatna chu Damparengpui-ah an hmang a ni.
He hun hmanpuitu, Robert Romawia Royte chuan Hodaigri Festival-in Mizorama hnam hrang hrangte inunauna tha zawk thlen se tih chu Mizoram sorkar duh dan a nih thu a sawi a. “Pathianin hnam hrang hrang min siama, Kristian ram kan ni a, kan hnam nunzia phochhuahna tura hun kan hmante pawh Pathian duhzawnga kan hman a pawimawh,” a ti bawk.
Festival hi ‘Hnam ziarang hloh chu hnam bo a ni’ tih thupui hmanga neih a ni a. Mizoram hmun hrang hrang atanga Bru cultural team bakah Rengdil Mizo Cultural Dance Team leh zaithiamte nen hun an hmang.
Sports minister hian Sihthiang-a fitness centre cum volleyball court siamna tur lungphum a phum nghal a. MLA, Zothantluanga pawhin thusawiin, Hodaigri Festival buatsaihtute hnenah chief minister aiawhin Rs 1,00,000 a hlan bawk.