Khawvelin Omicron a buaipui thar leh mek laiin Assam-a Dibrugarh-ah, Indian Council of Medical Research (ICMR) hnuaia mi, Regional Medical Research Centre (RMRC) chuan testing kit thar, darkar hnih chhung leka Covid variant thar kai leh kai loh hriat theihna an siam chhuak.
Tunah hian India ram hmun hrang hrangah ram dang atanga lutte chu thlawhna tumhmunah endik niin hei hian hun rei tak a duh thin a. Tuna endikna hmanraw siam chhuah thar hian passenger-te hun tam tak a humsak thei tura ngaih a ni.
ICMR Dibrugarh team hian he kit siam tur hian November 24 atang khan an bei a ni.
An kit siam chhuah hmang hian Covid-19 kai mi 1,000 chuang sample chu a endik (scan) a, hengte hi state danga mite pawh niin Omicron kaite sample pawh a ni.
Hman phalna hi dil mek a ni a, tun karah chuan phalna hmuin lab-ah pawh hman tan hman ni tura ngaih a ni.
A siamtute hi Dr Biswajyoti Borkakoty, Senior Scientist, Regional Medical Research Centre, Indian Council of Medical Research (RMRC- ICMR), Dibrugarh chuan a ho a ni.
“ICMR-RMRC Dibrugarh chuan Omicron variant (B.1.1.529) hmu thei tur hydrolysis probe-based real-time RT-PCR assay a siam a, hei hian darkar hnih chhungin variant thar hi a hmu thei dawn a ni,” tiin Dr Borkakoty chuan a sawi.
An kit siam chhuah hi a hlawm deuhvin ICMR-RMRC Dibrugarh chuan a siam mek a, a vaiin India-a siam vek niin Kolkata-a hmunpui nei company, GCC biotech nen public-private partnership (PPP) model hmangin an insiam tawm.
Test kit thar hi RT-PCR khawl awmna lab-ah chuan hman theih a ni dawn a, on-site test kit an tih, anti-gen test kit ang chi a ni lo.
South Africa-a hmuh chhuah Omicron coronavirus hi India-ah hian Delhi, Rajasthan, Maharashtra, Karnataka, Andhra Pradesh, Chandigarh leh Gujarat-ah te a kai hmuh tawh niin mi 37-in an kai tawh a. Hri dangte aia inkai awlsam zawk nia sawi a ni.