India rama coronavirus Omicron variant kai hmuh chhuah chu mi 37 an tling ta a. Pathianni khan Chandigarh, Andhra Pradesh, Karnataka leh Maharashtra-ah mi pakhat theuhvin an kai tih hmuh chhuah belh leh a ni.
Andhra Pradesh leh Chandigarh-ah a kai hmuh chhuah thar hmasak an ni a. Karnataka-in dawtin a hnuah Nagpur khawpuiah hmuh a ni leh.
Maharashtra-a Nagpur khawpuia Omicron kai hmuh hi mipa kum 40 mi, South Africa atanga Delhi tlawh kuala lo haw a ni a. Delhi a thlen rual hian December 6 khan hri a kai tih hmuh niin National Institute of Virology-a genome test tihna result chu Pathianni khan a chhuak a ni.
Maharashtra-a Omicron kai mi 18-na a ni ta a. Hri hi a darh lohna turin thuneituten inkhuahkhirhna siamin Mumbai-ah pawh December 11 leh 12 khan pun khawm phal loh a ni.
Mipa kum 20 mi, Italy-a cheng, Chandigarh-a a chhungte tlawh chuan Omicron a kai tih hmuh a ni bawk a. Ani hi November 22-a thleng niin an chenna inah khung hran a ni a, Covid-19 a kai tih hi December 1 khan hmuh niin genome sequencing tihah Omicron a kai tih hmuh chhuah zui a ni.
Natna a nei lem lo va, Italy-ah Pfizer vaccine bikim a la tawh a, sorkarin enkawlna tur a siamah a awm mek a. A chhungte pasarih pawh khung hran an ni a, RT-PCR endikah hri an kai lo vek.
Andhra Pradesh-ah Ireland atanga haw pawhin Omicron strain a kai tih hmuh niin hei hian khawvel hmun hrang hrangah he variant hi a darh tawha ngaihna a tilian hle a. Amah hi Vishakhapatnam-ah a awm mek.
Delhi, Rajasthan, Maharashtra, Karnataka leh Gujarat-ah te a hmain COVID-19 variant thar kai hi hmuh an lo ni tawh a. Maharashtra hi an tam ber tawhna a ni.
World Health Organisation-a South East Asia Regional Director Dr Poonam Khetrapal chuan, “Variant thar avang hian dinhmun hi a chhe ta sawt tihna a ni lo va; mahse, kan dinhmun hi a chiang lo zual sawt tih erawh a chiang,” tiin NDTV a hrilh a. “Asia chhim lam ramah phei hi chuan kan invennate hi kan dahthla mai tur a ni lo hrim hrim,” a ti.
Kar hmasaah khan WHO hian Asia-Pacific region-a awmte chu an damdawi inte tichangtlung tur leh invenna pawh chak lehzuala pea hri kai pung tur laka inhmakhua turin a lo ti tawh.
Tar lan tawh angin Omicron strain hi a hmaa mite aia inkai awl a ni a, ram 59 velah a kai an awm tawh a. UK, Denmark leh South Africa te chu a kai tam zual tawhna a ni.
India-a Omicron kai hmuh chhuah tawhte hi an kum zat a darhsarh hle a. Kum upa lam bakah nausen kum khat mi leh naupang kum thum mi leh pawh an awm.
Omicron variant kaite hi a tlangpuia sawiin natna nei lem lo an ni vek a, khawsik sang tak nei pawh an awm lo va. A tam ber chu chawlhkar khat chhungin enkawl dam hman an ni.
Natna lang chhuak neite pawh khawsik sang lem lo leh taksa sil deuh a ni ber.
A kai mi tlem te tih loh chu India-a Omicron kai enkawl tawhte chu ram pawn lama zin chhuahna lo nei tawh an ni deuh zel.
December 2 khan India-a Omicron kai hmuh chhuah hmasak ber a ni a, hei hi South Africa-a variant thar hmuh a nih atanga chawlhkar khat dawn tihna a ni a. He hri hmuh chhuah thar avanga inkai a chak tia khawvel a buai lai a ni.
Report thar berah chuan nausen kum khat leh a chanve mi, hmeichhia chu Inrinni khan dama chhuahtir a ni a. Mipa naupang kum thum mi pawhin dam lam a pan mek tawh bawk.