Kum thara Manipur assembly inthlan lo awm turah chuan Armed Forces (Special Power) Act, 1958 hlih chu party hrang hrangin campaign au hlapui bera an neih ngei rin a ni.
December 4-a Nagaland-a sipaiten civil mi 14 zet an thah hnuah khan hmarchhaka he dan hmanna hmun hrang hrangah hlih phutna thawm a ring sawt hle.
Manipur-ah hian BJP kaihhruai sorkara tel pahnih, Naga People’s Front (NPF) leh National People’s Party (NPP) bakah eptu, Congress chuan Inrinni khan Manipur-a AFSPA hman mek chu hlih an phut thu an sawi.
NPP leh NPF hian ‘dan nunrawng’ tia an sawi hlih ngei an phut thu sawiin, he dan hian helho chetna a ven aiin hmarchhakah helna a titamin a tiralti mai mai niin a sawi.
Manipur Pradesh Congress Committee-a working president Keisham Meghachandra pawhin Inrinni khan Manipur Chief Minister N. Biren Singh chu Prime Minister Narendra Modi biaa parliament thlasik thutkhawm neih meka AFSPA hlih a nih theih nana nawr turin a ti.
“Manipur cabinet hian state puma AFSPA hlih duhna thu hi an pass ngei tur a ni,” tiin Imphal-a thuthar lakhawmtuten an kawmnaah a sawi.
Meghachandra chuan Congress sorkar khan Manipur-a assembly bial pasarihah AFSPA an lo hlih tawh thu a sawi bawk.
“Kum 2022 inthlanah hian Congress hian thuneihna a chang a nih phawt chuan cabinet meeting hmasa berah AFSPA hlih nghalna tur hi a pass ang,” a ti.
Manipur assembly-a thu tur member 60 thlan hi nakum February-March vela neih a nih rin a ni.