Serchhip district-a Covid-19 vei thahnem tak hmuhchhuahna, Neihloh khua chu Inrinni tlai dar 5 atanga thu leh awm hma atan, hri darh zel tur ven nan hmun khuahkhirh bik, restricted area-ah Serchhip Bawrhsap Kumar Abhishek chuan a puang.
Tar lan tawh angin Neihloh khuaah hian a tum khat nan December 8, 2021 khan hri vei hmuh chhuah tan niin, December 11, 2021 thleng khan chhugkaw 64, mihring 340 vel chenna khuaah hian hri vei mi 87 hmuh chhuah a ni tawh.
Hri vei hmuh chhuah zinga mi pasarihte chu Thenzawl Tualvungi Venga Integretaed Ayush Hospital (3C) ah dah luh an ni a, mi dang 80-te chu Community Covid Care Centre (4C)-ah enkawl mek an ni.
Hri vei zingah hian Neihloh VLTF hruaitute an awm nual avangin hmalak a harsat thu leh khawtlang an phek buai mek thu, Neihloh VLTF chairman charge latu, vice chairman leh YMA president ni bawk, Lalbuatsaiha chuan a sawi.
Tun dinhmunah hri vei leh vei loh la endik loh, mahni ina inkhung zingah pawh Covid-19 symptom ang nei an awm nual nia a lan avangin sorkar atanga puihna an mamawh thu a sawi bawk.