United States-a state paruk ngawt mai tornado na tak maiin a nuaiah mi 83 vel thi awm tawhin in chim leh chhe karah dam chhuak zawn beihpui thlak mek zel a ni.
Zirtawpni-a tornado 30 chuangin a nuaiah hian mi thahnem tak an chin hriat lohva awmin khaw eng emaw zat chu a nuai chhe vek.
President Biden chuan a tuar nasa ber, Kentucky-ah chuan ‘chhiatna a thleng’ tiin a puang tawh.
Kentucky-ah hian bati siamna factory-ah mi 70 chuang an thi a, thi hi mi 100 an tlin chhoh thuai rin a ni.
Congressman pakhat, James Comer chuan Mayfield khawpuia chhanchhuah hna thawktute puiin a hriat chinah tornado na ber a nih thu a sawi.
“Ka hmuh tawhah chuan chhiatna thlen nasa ber a ni a. Khatianga thawk rei kha kan lo hre tawh thin a; mahse, a huam zau zawng kha aia zau kha ka la hre lo,” a ti.
Bati siamna hmun atang hian mi 40 chu dama lak chhuah an ni a; mahse, mi 60 chuang chin an la hre lo va. A hmun tlawhtu, Kentucky Governor Andy Beshear chuan dam an la awm chuan thil mak a nih tur thu a sawi.
“Feet 15 vela sang thir chungah car, chemical thil awmna barrel dah a ni a, chu chu a chim ta a. Dam kan hmu leh a nih chuan a mak khawp ang,” a ti.
Beshear-a chuan tornado hian mel 227 vela zau a tuam niin a sawi a. “Ka pi leh pute awmnaa block pakhatah phei chuan in ding hmuh tur a awm tawh lo va, a chengte kha khawiah ngei an awm pawh kan hre lo,” a ti.
Tornado hian Edwardsville, Illinois-a Amazon warehouse pawh a nuai chim a, mi paruk an thi a. Police chuan thawktu engzat nge chin hriat lohva awm an la hre thei lo.
Biden-a chuan Federal Emergency Disaster Declaration puangin Kentucky puihna tur pawisa a pe chhuak a. Chhiatna chu a lungchhiatthlak a tih thu a sawi bawk.
Mi sang tam takin tui leh power an la nei lo.
A tuartu dang – Missouri, Arkansas, Illinois, Tennessee leh Mississippi te pawhin sorkar laipui atanga puihna hi an mamawh a nih chuan a awm tih President chuan a sawi bawk.