Mizoram Chief Minister Zoramthanga chuan Myanmar ram buai avanga sahimna zawnga Mizorama raltlante tan sorkarin theihtawp a chhuah zel tur thu a sawi.
CM Conference Hall-ah nimin khan Mizorama awm mek Myanmar MP-te chuan chief minister hi an kawm a. An inkawmnaah hian chief minister chuan Myanmar ram buai avanga sahimna zawnga India rama lutte chu Mizoram chuan chhawmdawl turin theihtawp a chhuah tur thu a sawi a. Harsatna an neih chuan a theih chin chinah sutkiansak dan ngaihtuah zel a inhuam thu a sawi.
Tun hnaia sorkar laipui dawra Delhi a zinnaah Prime Minister Narendra Modi leh Union Home Minister Amit Shah a hmuh tumin raltlanten tuamhlawm an mamawhzia te, Myanmar rama mipui sorkar ngialnghet din tura an entawn tur tha ber chu India ram a nih thu te leh India ramin Myanmar chu a ensan theih loh thu a hrilh thute sawiin, anni pawhin an ngaihven thu a sawi bawk.
Chief minister hian Myanmar-ah mipui sorkar chu hun rei vak loah tun din a nih leh ngei a rin thu a sawi a. Theihtawp chhuaha huaisen takin an tan a beih zel tur thu Myanmar MP-te chu lo hrilhin, Mizoram mipui leh Myanmar unaute inkarah inunauna nghet leh tha tak a awm theih nan theihtawp chhuah tlang zui zel turin a sawm nghal a ni.
Myanmar MP te pawhin Mizoramin tha taka lo dawngsawng a, an lo tuamhlawm avangin lawmthu an sawi a. Sorkar bakah tlawmngai pawl, zirlai pawl, kohhran leh mipuiin an tana hma an lakna zawng zawng chu ropui tiin raltlan ang ni lo, inpui a lo lut ang mai an nih thu te an sawi a ni. Harsatna hrang hrang an tawhte leh thu pawimawh dang chief minister hnenah an thlen bawk a ni.
He inkawmnaah hian Mizoram State Planning Board Vice-chairman H. Rammawi leh OSD to CM Rosangzuala te an tel bawk.