Lucy Lalremmawii, Tanhril chu a pasal kutthlak tuar lohin a thi nia ngaiin MHIP Tanhril Branch-in thihna thlen chhan chhui chhuak turin thuneitute an ngen.
Hemi chungchanga thuchhuah an siamah MHIP Tanhril Branch chuan Lucy Lalremmawii d/o J.Biakkhuma (L), Tanhril chu December 12, 2021 khan Civil Hospital, Aizawlah a thi tih leh a thih danah hian thil fel tawk lo, chhui chian ngai a awm nia an hriat thu an sawi a, Lucy-i thih chhan leh a thih dan chu chiang taka chhui chhuak turin thuneitute an ngen tih an tar lang.
An thuchhuaha an tar lan danin, Lucy-i leh a pasa,l Hmingthansanga s/o Zaithangpuii, Lallen khua nen hun eng emaw chen inneiin tun hnaiah an inthen a, damdawi ina dah ngai khawpa hliam a tawrh chhan hi a pasalin kut a thlak vang niin a lang.
MHIP Tanhril Branch chuan hmeichhe awmnem zawk leh tanpui ngai zawk chunga khawngaihna leh lainatna tel hauh lova kutthlak a ni leh thihna hial a thleng chu an dem tak zet tih sawiin, an member, Lucy Lalremmawii thihna chungchanga mawhphurtu chu rang taka chhui chhuak a, a phu ang ngeia hremna na tak pe ngei turin thuneitute an ngen tih an tar lang.
Tanhril khawtlang hruaitute hnen atanga thudawn danin, Lucy Lalremmawii chhungte hian police-ah FIR an thehlut tawh a, a pasal then tawh, Hmingthansanga hi police-in lain Central Jail-ah an dah tawh.
Lucy-i kut tawrh ni hi December 9 kha a ni a, a tukah Civil Hospital, Aizawl-ah ah an inentir a, December 12, Pathianni zing khan a thi ta a ni.