Thawhtanni tlai khan helhovin Jammu and Kashmir-a Srinagar khawpuiah police bus an kap a, hriat theih chinah police pahnih an thi a, mi dang 10 velin hliam an tuar bawk.
Police bus beihna hi khawpui daih deuh, Pantha Chowk huam chhung, Zewan-a police camp bul lawkah a ni. A hmun hi venhim hna thawktu dang dangte pawhin camp an neihna hmun a ni.
Bus kaptute hi pahnih an ni a, an bus beih hi silai kah tlang theih loh a ni lo va, police chuangte pawh hi silai keng lo, phaw leh tiang keng an ni.
Hliam tuarte hi damdawi inah dah nghal an ni a. Thil thlenna hmun hi tlawhpawh theih lohva dan nghal a ni bawk.
Thawhtanni vek khan Srinagar-a Rangreth venga hel pahnih thah an nih thu Jammu & Kashmir police chuan an lo sawi tawh bawk.
Thawhtannia police beihna thleng hi tun hnai lawka mi firfiakten Kashmir-a Bandipora district-a police team an beihnaa pahnih an thah hnu lawka thleng a ni.
December 10-a Bandipora-a Gulshan Chowk-a inbeihna thlengah hian police pahnih hliam na tak tuarte chu damdawi in thlenpui an nih hnuah doctor-ten an thi tih an puang a ni.
Tun hnaia mi firfiakten Kashmir phaikuama state dang atanga hna thawka awm leh hnam leh sakhaw zuitu tlem zawkte an beihna a thlen hnua an chetna lian pahnihna a ni tawh tihna a ni.
Thla hnih liam ta chhunga mi firfiakte chetna thlengah hian a titute hi thah zui vek an nih thu police chuan an sawi.
Chief minister hlui, Omar Abdullah chuan he thil thlenga thi chhungte a tawrhpui thu a sawi nghal a. Twitter-ah National Conference hruaitu chuan, “Srinagar daia mi firfiakten police an beihna rapthlak tak a thleng tih ka lo hria a. He beihna hi ka dem tak zet a, a tuartu chhungkua ka tawrhpui a, hliam tuarte pawh ka tawngtaipui a ni,” a ti.
Beihna thleng chanchin kimchang hi he chanchin buatsaih lai thleng hian a kimchanga hriat hleih theih a la ni lo va. A tirah chuan Kashmir Zone Police pawhin Twitter-ah police 14 hliam an awm thu chauh tar langin thi an awm thu a ziak lang lo va; mahse, a hnuah puan a ni a, a la kim chuang lo.