Tornado na takin United States-a Kentucky state-a khaw eng emaw zatah chhiatna a thlenah governor chuan thi mi 100 an tlin ngei a rinawm hle tih a sawi a, dam chhuak zawn hna an thawh mekah dama mi hmuh an neih a beiseiawm loh sawt hle tih a sawi bawk.
Andy Beshear chuan an state-in tornado a tawrh nat berah hian mi 80 vel thi tih finfiah an awm tawh tih a sawi.
“Tornado-in a zawh kawngah hian engmah ding reng a awm lo,” a ti.
Kentucky bakah hian state dang paliah mi 14 thi an awm bawk tih sawi a ni.
President Joe Biden chuan Kentucky-ah hian chhiatna lian tak a thleng tih puangin sorkar laipui atangin an mamawh ang puihna pek an ni ang.
Chhanchhuah hna thawktute chuan in chim leh chhe karah dama chhanchhuah tur an awm leh awm loh an zawng a. Team dangin tui leh generator an sem bawk a. National Guard member 300 chuangin in tinah senghawi ngaite an senghawi bawk.
“Thil mak tak thlengin dama chhanchhuah theih an la awm em tiin kan la bei tang tang a ni,” tiin governor hian a tuar na ber zinga pakhat, Mayfield khua a tlawhnaah a sawi.
Inrinni tuk atanga chhanchhuah hna thawhah hian tumah dama lak chhuah an la nei lo zel.
Beshear-a chuan tornado hian km 365 (mel 227)-a thui a kalkawngah chhiatna a thlen tih a sawi a. Mi sang tam tak an in chhe karah an awm a, an tuartu zat pawh hriat mai theih a ni lo tih a sawi.
US-a khawmuala tornado kawng zawh thui ber chhinchhiah chu March, 1925-a Missouri-a thawk, mel 219-a thui kha a ni a, mi 695-in nunna an chân a. Tun ang hun, thal leh nipui ni si lova hetiang thawk hi a vang hle hle.
Mayfield-ah hian fire station leh city hall chu a chhe vek a. “Engtin nge he khuaa in leh lirtheia darthlalang leh chenna in zawng zawng hi a chhiat vek loh theih hi a mak a ni,” tiin Mayor Kathy Stewart chuan a sawi.
Bati siamna hmun (candle factory)-ah thawktu mi 110 awm zinga pariat an thi tih company thupuangtu chuan Reuters news agency a hrilh a, mi pariat chin hriat a la ni lo.
A tira rin aiin he factory-a thi hi an tlem zawk a. Hei vang hian governor-in thi zat tura rin zat pawh an tlem theih phah rin a ni.
Factory-a thawk pakhat, Kyanna Parsons Perez chuan an factory chim kar atangin Facebook-ah puitu tur a ko va, tornado thawk tur avang hian sumdawnna hmun dangte chu khar niin hna an thawk hlawm lo niin BBC a hrilh bawk.
Illinois state-ah chuan , Edwardsville-a Amazon warehouse chimah mi paruk an thi a, mi dang chin hriat loh an la awm mek bawk.
Tennessee-ah mi pali an thi a. Arkansas-ah mi pakhat a thi bawk a, hei hi nursing home pindan thenkhat chim vanga thi a ni a. Missouri-ah mi pakhat thi a awm bawk.
President Biden chuan an ram state hrang hranga tornado thawk leh chhiatna nasa tak thlengah hian Environmental Protection Agency chu rawnin sik leh sa inthlak nasain he thil hi a thlen phah a ni reng em tih enfiah turin a ti.