Omicron coronavirus variant chu ram 60 chuangah a kai hmuh an ni tawh a, World Health Organization chuan khawvel pum tan ‘hlauhawm’ a nih thu sawiin finfiahna thenkhatah chuan vaccine pawhin a ngam lo tih a sawi a, hetih rual hian finfiahna chiang zawk erawh la dap zel a nih thu a sawi.
Pathiannia WHO-in thla hmasaa South Africa leh Hong Kong-a a hmuh chhuah hri chungchanga technical brief a neihah a insiam danglam nasat em avangin a hmaa mite aia inkal awlsam daih zawk a nih thu a sawi.
“Variant thar, Omicron hi chhan hrang hrang avangin ngaihven ngai tak a la ni reng,” tiin November 29-a he hri chungchanga thu a chhuah chu a la danglam lo tih a tar lang.
“Finfiahna thenkhat atang chuan a kai tawhte pawhin kai mai theih a ni a, inkai a awl a, hei hian nasa taka darh a thlen thei,” tiin WHO chuan a sawi a. A hmaa kaiin kai nawn lohna tura a taksaa do theihna a neih pawh a paltlang thei dawn niin a sawi.
Hri thar hmuh chhuahna, South Africa-ah chuan a lo kai tawh kai nawn leh pawh an pung zel niin khawvel huap hriselna lam ngaihtuahtu pawl hian a sawi.
Hetih lai hian South Africa-a finfiahna neihah chuan Omicron hian tuna khawvela kai tam ber, Delta variant aiin natna a thlen nep zawk tih hmuh a ni a. Europe-a a kai hmuh tawhte pawhin natna an nei lutuk lem lo va; mahse, ngaihthah erawh a chi loh tih an sawi.
“Eng ang chiahin nge hna a thawh theih tih chiang turin data kan la mamawh belh a ni,” an ti.
“Delta aiin lo thawk nep pawh ni se kai an tam dawn miau avangin damdawi ina lut an tam dawn a, hei hian damdawi in indaih lohna a siam ang a, thi pawh an pun phah ang,” an ti bawk.
Omicron nihna chiang zawk hi hriat belh turin hun a la mamawh deuh dawn tih WHO chuan a sawi a. A hun hmaa inthlahdah chu a la hun lo tih a sawi bawk.