Nimin zing khawvar hma khan Chaltlang Lily Veng, Sairang road kawng chhak atanga lung tlain lirthei pariat a delh chhia a, dawr pakhat luah tlak lohin a tichhe bawk.
Lung tlakna hmuna chengten The Zozam Times an hrilh danin, Thawhtanni zing dar 3:30 khan lung lian tak hi a tla a, helai bawr vela chengte a tiralkhel hle a. Lirthei leh in thenkhat tihchhiat nei mah se thi leh hliam erawh an awm lo.
Lung tla hian Ramchullova In, Lalrampari ten chenna leh dawr atana an luah lai chu dengin, dawr bungraw awm zawng zawng a tichhe vek a, heng bakah hian an lirthei Santro car leh scooty te a tichhe bawk a, he ina cheng zingah hliam tuar an awm lo a, an chenna erawh luah zui tlak a ni tawh lo.
Helai bawr vela cheng, Biakpari vawk no pakhat, Sangzuali sintex pathum bakah kawngpui sira lirthei dah 407 truck pathum, car, scooty leh bike pakhat theuhte chu lung tla hian a delh chhe bawk.
Thawhtanni khawvar hmaa lung tla hian darkar eng emaw zat kawngpui a hnawh ping a, PWD National Highway Division I-te hriattir an nih hnuah zing dar 8 bawr vel khan lirthei zawh theiha then fai a ni.
Sairang Road kawng chhaka lung tlakna hmun hi nimin zing khan Aizawl North I bialtu MLA Vanlalhlana chuan a tlawh nghal a, PWD-ten tlin taka an hna an thawh avanga motor-a veivakte tana harsatna lutuk awm lova kawng an then fai nghal avangin PWD thawktute chungah lawmthu a sawi.
Vanlalhlana chuan chhiat tawhna hmunah hian a theih ang anga invenna kalpui a niha chhiatna a thlen nawn tawh lohna tura hma la turin thuneitute hnenah a thlen bawk.