South Africa President Cyril Ramaphosa chu Covid-19 a kai ve avangin enkawl mek a nih thu a pisa chuan a puang.
Kum 69 mi, Ramaphosa hian natna lang chhuak tlem a nei a, Cape Town-ah inah inenkawl mekin a awm.
Ramapahosa-a hi Pathiannia president hlui, FW de Klerk-a vuinaa a tel hnu atang a awm a nuam lo tan a ni.
A pisain thuchhuah an siamah chuan mawhphurhna zawng zawng chu Deputy President David Mabuza kutah chawlhkar khat chhung a dah.
President hi a dinhmun a tha a, ngaihtuahawm a ni lo va; mahse, doctor-ten an vil reng tih an sawi.
Tun hnai lawkah khan Nigeria, Ivory Coast, Ghana leh Senegal-a ni sarih chhung zinin a haw deuh chiah a. A zinpui thenkhatte chu Nigeria-a an awm laiin hri an kai tih hmuh niin South Africa-ah thawn haw nghal an lo ni tawh nghe nghe.
February thlaa invenna la tawh, Ramaphosa-a leh a thuihhruaite hi an zinnaah hian ram tinah Covid-19 an kai leh kai loh lo endik zel niin president pisa chuan a sawi.
President hian amah ngei pawhin hri a kai ta chu an ram mipuite laka vaukhanna pea mahni invenga invenna la tura hrilhtu a nih theih a beisei tih a pisain thuchhuah an siamah hian tar lan a ni.
South Africa-ah hian November 24-a hri chi thar, Omricon variant tia an vuah tak, khawvelin a buaipui mek hmuh chhuah a nih atang khan hri kai hi nasa takin an pung mek.
Variant thar hi ram eng emaw zatah a kai an awm tawh a, ram tam takin a intanna, African chhim lam ramte an tlawhserh phah a, hei hi Ramaphosa hian a sawisel nasa hle nghe nghe.
Darkar 24 liam ta chhung pawh khan mi 18,000 vel hri kai an hmu leh a; mahse, mi tam takin invenna an la la duh chuang lo.
%%%%%