Indian police chuan mi pakhat, lung ina tang, a tan nawn leh duh loh avangin thi angin a inchhal an man chhuak.
Uttar Pradesh-a officer-te chuan kum 36 mi, Sudesh Kumar-a hian mi pakhat thatin a ruang chu a nupui puihnain amah angin an chhal a ni.
Mahse, police hian CCTV atangin a?ruang hi amah ngeiin bike-a a phur lai an hmu si a ni.
Kumar-a hi kum 2018-a a fanu kum 13 mi a thah avanga man a ni a; mahse, Covid-19 hripui avangin chhuah lailawk a ni.
India-ah hian state eng emaw zat chuan hripui a len lai khan tan in tawta a tangte an inkai darh hlauh avangin mi tam tak an chhuah a ni.
Kumar-a hi chhuah lailawk hun a tawp hnuah lut leh tur a ni a, hetiang hian thi anga awma lung in tan tawh loh hi a tum a ni.
Police hnena a inpuan dan chuan November 19 khan lung mistiri, Domen Ravidas-a hi a that a. Ravidas-a hi san lam leh rih zawngah pawh amah ang vel chiah a ni a. Kumar-a hian an ina lung rem hna vel thawk turin a ruai a ni.
Ravidas-a ruang hi an inrawih tukah chhar niin a kang hlum ni awm tak a ni a, amah pawh a hriat theih meuh tawh lo va; mahse, Kumar-a ID card chu a ipte-ah hmuh a ni.
Kumar-a nupui, Anupama chuan a pasal ngei nia chhalin Delhi-a an inah a la a ni.
Kumar-a hi a thi tak tak lo nia an hriat hnuah officer-te hian an in dalin an man leh ta a, an thil tih dan pawh a puang ta a ni.
A nupui pawh a thiltihnaah hian puitu a nih avangin an man bawk.
Superintendent of Police Iraj Raja chuan officer-ten hetiang an hai chhuak thei hi a fak a. “He mite hian ruahmanna tha tak an nei ngei a; mahse, police-in tualthahna dang an man chhuak ta zawk a ni,” a ti a. “He team hi chawimawina pek an ni ang,” a ti bawk.