Lungsen Area Land Owner Coordination Committee for NH 302 (LALOCC-NH 302) chuan sawrkar nena an inremna anga November thla chhunga ram neitute account-a zangnadawmna pawisa a luh tak loh avangin NH 302 kawng laih hna thawk mektute chu nimin khan an hna thawh laite chawlhsan rih turin an hriattir.
LALOCC-NH 302 hruaituten The Zozam Times an hrilh danin, tun dinhmunah National Highway 302 thawm that hna thawh turah hian Lungsen area-ah vek hmalak a la ni a, ram neitute leh sorkarin inremna ziaka zangnadawmna November thla chhunga thun vek tura inremna an ziah vang a ni.
Hetianga inremna ziah a nih mek lai hian nimin thleng khan zangnadawmna pawisa hi ram neitute account-ah a la luh loh avangin Pathiannia Lungsen Area Land Owner Coordination Committee executive thukhawm chuan hreh tak chungin hnathawkte chawlhtir an rel ta a ni.
Hnathawkte an chawlhtir hian thu leh awm hma leh ram neitute account-a pawisa a luh hma chuan hna an thawh an remti tawh dawn lo tih an sawi.
Lungsen area-a ram neitute hian sorkar nen an inrem angin November thla tir atang khan an ram pawh phal takin an lo laihtir tawh a, December 1 khan an ram pass orginal pawh Lunglei Revenue Office-ah CALA duh dan angin dah luh a, an account pawh check fel tawh a ni a, hetihlai hian thawm a awm leh tak si loh avangin hnathawkte hi an chawlhtir ta a ni.
Hnathawk chawlhtir a nih chungchangah hian nimin thleng khan sorkar lam leh NHIDCL lam atangin ram neitute hi biak an ni lo va, an dinhmun tur engmah hrilh hriat chian an ni lo bawk.