Mizoram sorkarin Aizawl helna tur kawngpui leh khawpui hnuaia leiverh (Tunnel) siamna tura rawtna a thlente chu National Highways & Infrastructure Development (NHIDCL) headquarters-in a pawm a, Detailed Project Report (DPR) siam turin consultant-te hriattir an ni.
Sorkarin Aizawl helna tur kawng kalna (Aizawl bypass alignment) siam a tum leh Aizawl khawpui hnuaia leiverh a tuma rawtna an siam chu NHIDCL headquarters chuan November 26, 2021 khan a pawm a, NHIDCL chuan December 8, 2021 khan an consultant hnenah kawng kalna tur pawm a nih thu leh DPR siam nghal turin hriattirna an pe.
NHIDCL-in sorkar rawtna an pawm chungchanga chanchingbu mi thenkhat zawhna chhangin Chief Minister Adviser (Technical) Er. K. Lalsawmvela chuan kawng helna tur siam leh leiverh chungchangah NHIDCL Consultant-in duhthlan tur chi li an siam a, Chief Minister Zoramthanga’n en lehin, a duh dan angin rawtna chu thlen a nih thu a sawi.
Er. Sawmvela chuan NHIDCL Consultant-ten thla thum vel chhungin DPR hi an peih fel hman an beisei tih leh sanction hmuh a nih veleh hnathawktu tur zawnna tender chhuah a ni dawn tih sawiin, “Aizawl helna tura kawng leh leiverh tur hi kum hnih emaw, kum thum emaw vel chhunga zawh hman beisei a ni a, siam zawh a nih hunah chuan Aizawl khawpui a lirthei tawt lutuk chu nasa takin a tihziaawm theih dawn a ni,” a ti.
Aizawl helna tur motor kawngpui siam an tum dan sawifiahin Er. K.Lalsawmvela chuan kawng hi Silchar atanga 4-lane tawpna atangin Aizawl helna tur kawng chu intan tura ruahman a nih thu a sawi a, “Kurunglui kânin Rangvamual ep pangah chho zelin Bawngkawn Brigade Field hnuaiah thlengin field hnuai atang hian leiverh (tunnel) chu tan tur a ni dawn a ni,” a ti.
Er. K.Lalsawmvela chuan an ruahman dan sawiin, lei verh hian Zemabawk-Selesih kawng, Muthi ram velah a chhuak dawn a, heta tang hian Muthi tlang panga her liamin Tuirial Airfield hmar lamah Tuirial kânin Seling rama Phaibawk kawn bulah kawngpui fin leh tura ruahman a ni tih a sawi.
CM Adviser (Technical) chuan bypass road hian leiverh luhna bul atangin Edenthar veng lamah double lane kawng sial phei a ni dawn tih a sawi a, hetiang bawk hian leiverh chhuahna, Muthi ram lam atangin Zemabawk Aizawl bypass World Bank road tia hriat lo chhuahna, Vaimandir bula lo chhuak tur double lane kawngpui sial a ni dawn tih a sawi bawk.