Mizoram sorkarin dan kalha ramri kâna bungraw hrang hrang tawlhruk thin chungchang zirchiang tur study group a din dawn.
Khawchhak atanga Mizoram kaltlanga dan loa kuhva leh bungraw hrang hrang tawlh luh chungchang ngaihtuahin nimin khan Chief Minister Zoramthanga hovin sorkar hotute an thukhawm a, dan loa bungraw tawlh ruk zirchiang tur study group din an rel.
|hukhawmah hian ram thenawm atanga damdawi, kuhva leh a dangte dan kalha lut thin chungchang an sawi ho a, hemi kawng India sorkar nena hmalak ho theih a nih theih dan turte an sawiho bawk.
Dan loa ram dang atanga bungraw tawlh ruk chungchang sawihonaah hian Commerce & Industry changtu minister Dr. R. Lalthangliana, Home Minister Lalchamliana bakah Home, Finance, Commerce & Industry leh Taxation department hotute an tel a ni.
Tar lan tawh thin angin khawchhak atangin dan loin kuhva leh bungraw dang tawlh ruk thin a ni a. A bikin kuhva rah tawlh luh chungchangah Social & Environment- Activist Vanramchhuangi chuan chief minister leh prime minister hnenah memorundum a lo theh lut tawh.
Chief minister hian Thawhtanni khan Vanramchhuangi hnenah hian dan loa bungraw tawlh luh chungchang ngaihtuah turin thutkhawm hmanhmawh a koh tur thu a lo hrilh tawh a, a sawi ang ngeiin nimin khan sorkar hotute lawkten hemi chungchang hi an ngaihtuah ta a ni.
Khawchhak atanga Mizoram kaltlanga dan loa kuhva tawlh luh hian Mizoram chhunga kuhva chingtute harsatna nasa tak a siam a, Hachhek tlangdunga chingtuten an thar an hralh theih loh phah a. Dan loa kuhva tawlh luh an duh lohzia lantir nan Hachhek tlangdunga kuhva chingtuten kawng zawh hial an tum a, hemi kawnga sorkar hmalakna hi an ngaichang mek a ni.