An enkawlte Kristiana inleh luihtira puh Mother Teresa pawl chhui dawn


Indian police chuan Mother Teresa-i din, Pathian rawngbawltu pawlin an mi enkawlte chu Kristianah an inleh luihtir em tih an chhui a. Hei hian Prime Minister Narendra Modi-a Hindu nationalist sorkarin Kristiante a nek nia sawi thawm awm thin chu ringhlel zualtu a tipung.
Gujarat-a Vadodara khawpuia police chuan Thawhlehni khan Missionaries of Charity hian an enkawl hmeichhe naupangte chu kraws awrh luitirin Bible an chhiar luihtir bawk nia sawi awm chu an chhui dawn tih an puang.
Modi-a chawr chhuahna state hi Hindu tamna niin ‘sakhaw inleh luihtir’ chu phal loh niin tun hnaiah phei chuan an keng khawng zual hle.
Vadodara district social officer Mayank Trivedi chuan police hnenah hian child welfare authority leh district thuneitu dangte atanga a hriat behchhanin a thlen niin AFP news agency a hrilh.
Complaint a thehluhah chuan an hmunah library-ah Bible 13 awmin hmeichhe naupangte hi an chhiar luihtir thin nia sawi a ni.
Activist-te chuan kum 2014-a Modi-a hova BJP-in thuneihna an chan atang khan India-ah hian sakhaw zuitu tlem zawkte an chepin nekna an tuar tam sawt hle niin an sawi.
Kum 2020 pawh khan US Commission on International Religious Freedom chuan kum 2004 hnu lama a vawi khat nan ‘ngaihven ngai’ huangah a dah a ni.
Modi-a sorkar erawh chuan ‘Hindu rama India siam’ tuma puhna an pha nasa hle a. Mi tu pawhin dan hmaah zalenna angkhat neiin an duh sakhua an zui thei vek niin an sawi.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427