Arctic-ah a lum lai berin 38°C (100°F) a kai a, hei hian khawvel pumah sik leh sa a inthlak nasa hle a ni tih a tilang.
World Meteorological Organization (WMO) chuan Thawhlehni khan hei hi puangin Siberia-a Verkhoyansk-ah nikum June 20 khan hetiang hian a lum tih a sawi.
Nikum June thla pum khan chawhrualin ni tin 18°C aiin a lum ziah a ni.
UN hnuaia mi, WMO chuan khaw lum uchuak tak hi Mediterranean aiin Arctic-ah a nasa zawk niin a sawi bawk.
Tun tum hi he agency-in khaw awm dan uchuak report a siama Arctic Circle a telh vawi khatna a ni nghe nghe.
WMO chuan 38°C hi Siberia-a meteorological station-a teh niin a sawi a. Khaw lum uchuak tak avang hian ram pawh a tikang nasain Russia pawhin carbon a tihchhuah tam ber kum a tawn phah.
A bikin nupui laiin, khua a lum a, thli chak tak a tleh bawk thin avangin ram a kang awl zual.
Siberia-a khua a lum em avang hian vun a tui nasa hle a, WMO chuan kum 2020 kha khawvel pum a lum ber kum a chhinchhiah pathum zingah a tel a ni.
WMO chuan Verkhoyansk-a pawh khaw lum ber hun an tawng hian sik leh sa hi khawvel pumah a inthlak nasa hle a ni tih a tilang tih a sawi.
WMO Secretary-General Petteri Taalas chuan, “Arctic-a khaw lum ber tum thleng leh WMO Archive of Weather & Climate Extremes-a telh a ni ta hian sik leh sa inthlak nasa lutuk lama beihpui thlak a tulzia a tilang,” a ti.
Arctic hi khawvela ram a lum chakna ber bial a ni a, khawvel pum lum chak lam chawhrual aiin helai hmunah hian a let hnih chuangin a lum chak zawk niin WMO chuan a sawi.
Arctic a lum viau hi lei hnuaia thil awmte a chet chhuah nasat phah thei a. Scientist-te chuan lei hnuaia mihring tana tha lo awm – carbon dioxide leh methane te a chhuak chak phah an hlau hle.
Hetiang, greenhouse gas an tih mai hi a lo chhuah nasat chuan a tilum zual bawk ang.
Khaw lum lutuk hian Arctic-a vur awmte chu a titui chak lehzual dawn a, tuifinriatah a luh chak lutuk chuan tui chim chin a tisang chak vak thei dawn a ni.
Khawvel lum chak lutuk hi mihring khawsak danin a hrin pakhat a ni a. Sik leh sa inthlak nasa lutuk hi tute pawhin an tawrh tur a ni.
Khaw lum zel tur hi ven a nih loh chuan mihring leh khuarel tan a lum telh telh dawn a. Khawkheng, tui chin chin sang leh thil (species) tam tak mang phahna a thlen thuai dawn a ni.